Уругвай Лотин Америкасида биринчи бўлиб эвтаназияга рухсат берди

Уругвай 10 соатлик мунозарадан сўнг эвтаназияни қонунийлаштирди.

Уругвай эвтаназияни қонунийлаштирди ва шу тариқа Лотин Америкасида ёрдам билан ўз жонига қасд қилишга рухсат берувчи қонунни қабул қилган биринчи давлат бўлди.

Эвтаназия — бу оғир ва давоси йўқ касалликдан азоб чекаётган беморнинг ҳаётини унинг розилиги билан тиббий йўл билан тўхтатишдир.

Уругвай парламенти оғир ва давоси йўқ касалликдан азият чекаётган беморларга эвтаназияни танлаш ҳуқуқини берувчи қонун лойиҳасини маъқуллади. Қонунга кўра, руҳий жиҳатдан соғлом, вояга етган шахс ўз ҳаётини тиббий йўл билан якунлаш тўғрисида ёзма равишда сўров юбориши мумкин.

Ҳужжат, даволаб бўлмайдиган касалликнинг охирги босқичида бўлган фуқароларга бу жараённи малакали тиббий мутахассислар томонидан, оғриқсиз ва ҳурматли тарзда амалга ошириш имконини беради.

Уругвай ижтимоий жиҳатдан либерал сиёсати билан ажралиб туради. Мамлакат илгари марихуана, бир жинсли никоҳ ва абортни ҳам қонунийлаштирган эди.

Қонун бўйича 10 соат давом этган муҳокамаларда депутатлар ўзаро ҳурмат билан мунозара олиб борган бўлса-да, овоз беришдан сўнг айрим норозилар парламент биноси ташқарисида “қотиллар!” дея норозилик билдиришди.

Либерал сенатор Патриция Крамер Монтевидеода чиқиш қилиб, “жамоатчилик фикри биздан бу масалани кўтаришимизни сўрамоқда,” деди.

Сўровнома натижаларига кўра, уругвайликларнинг 62 фоизи эвтаназиянинг қонунийлаштирилишини қўллаб-қувватлайди (манба: Цифра консултацион фирмаси).

Эвтаназияга энг катта қаршилик католик черкови томонидан билдирилди. Монтевидео архиепископи Даниэл Стурла Catholic News Agencyʼга берган интервьюсида шундай деди:

“Бу қонун ҳаётни қадрлашга эмас, балки айрим ҳаётларни бефойда деб ҳисоблашга хизмат қилади. Биз уни тубдан ёмон, нотўғри деб биламиз.”

Қонун қабул қилинганидан сўнг, 20 йилдан бери ALS касаллигидан азият чекаётган 71 ёшли Беатрис Гелос бу ташаббусни “раҳмли ва инсонпарвар қарор” деб атади.

“Бошқалар бу ҳолатда яшаш қандайлигини тасаввур ҳам қила олмайди,” — деди у.

Уругвай шу тариқа Лотин Америкасида эвтаназияни қонун билан рухсат берган биринчи давлат бўлди. Колумбия ва Эквадорда эса бу амалиёт Олий суд қарорлари орқали декриминализация қилинган.