"Толибон" Афғонистонда интернетни бутунлай ўчириб қўйди
Жараён ахлоқсиз ҳисобланадиган амалиётларга қарши кураш кампанияси доирасида амалга оширилган. Бу мобил алоқага ҳам таъсир этди.
"Толибон" Афғонистонда интернетни ўчирди.
Net Blocks халқаро интернет мониторинги хизматига кўра, Афғонистонда ахлоқсиз деб ҳисоблайдиган амалиётларга қарши кураш кампаниясида бошқараётган "Толибон" ҳукумати мамлакат интернет хизматини бутунлай ўчириб қўйди.
“Афғонистонда “Толибон” ҳукумати маънавий-ахлоқий меъёрларни қўллаши натижасида интернет бутунлай ўчиб қолди: эрталаб кўплаб тармоқлар секин-аста ўчирилди; бу телефон алоқасига ҳам таъсир қилди”, - дея эълон қилди Net Blocks Mastodon.social ижтимоий тармоғида.
Бир неча Кобул аҳолисининг BBCʼга айтишича, уларнинг оптик толали интернет хизмати иш кунининг охирига келиб, маҳаллий вақт билан соат 17:00 атрофида ишламай қолган.
AFP халқаро ахборот агентлигининг хабар беришича, у Кобулдаги бюроси билан алоқа, жумладан, мобил телефон хизмати ҳам узилган.
Афғонистон бўйлаб мобил интернет ва сунъий йўлдош телевидениеси ҳам жиддий равишда узилиб қолган. Бундан ташқари, Афғонистон пойтахтидан олинган хабарларга кўра, Кобул аэропортидан парвозлар ҳам бекор қилинган. "Толибон" бир неча ҳафта олдин мамлакатнинг турли вилоятларида юқори тезликдаги оптик толали интернет алоқаларини ўчириб қўйишни бошлаган ва шундан сўнг маҳаллий фойдаланувчилар интернет хизматининг секинлигидан ёки ҳатто тўлиқ ўчиб қолганидан шикоят қилишган.
Маҳаллий тадбиркорлар бундай амалиёт давом этса, катта зарар кўришини билдиришди.
"Толибон" ҳукумати аввалроқ, батафсил маълумот бермасдан, муқобил интернет каналларини яратишини эълон қилди.
“Афғонистон энди Шимолий Корея билан интернетни ўчириш бўйича мусобақада расман биринчи ўринни эгаллади”, деб ёзди Афғонистондаги 1ТВ телеканалининг собиқ бош муҳаррири Ҳамид Ҳайдарий Х ижтимоий тармоғида тўлиқ ёпилишини изоҳлар экан.
"Толибон" 2021 йилда ҳокимиятга келганидан бери Афғонистонда шариат қонунларини изчиллик билан амалга ошириб келмоқда.
Уларнинг сўнгги ҳаракатлари орасида университетларда аёллар ёзган китобларни ўрганишни тақиқлаш ҳам бор. Шу билан бирга, улар инсон ҳуқуқлари ва жинсий зўравонликка оид материалларни ўрганишни тақиқладилар.
Бунгача "Толибон" 12 ёшдан ошган аёллар ва қизлар учун мактаб ва бошқа таълимни бутунлай бекор қилган эди.