Тўйлар, оилавий тантаналар, маърака ва маросимлар қатъий назоратга олинади
2026—2030 йиллар “Долзарб озиқ-овқат хавфсизлиги даври” деб эълон қилинади. Аҳолига кунлик тўғри овқатланиш бўйича тушунтиришлар олиб борилади.
Ўзбекистонда “Оқилона истеъмол” дастурини амалга ошириш доирасида тўйлар, оилавий тантаналар, маърака ва маросимлар белгиланган тартибда ўтказилиши қатъий назоратга олинади.
Бу ҳақда Вазирлар Маҳкамасининг 16 сентябрда эълон қилинган 589-сон қарорида маълум қилинган.
Ҳужжатга кўра, 2026—2030 йиллар “Долзарб озиқ-овқат хавфсизлиги даври” деб эълон қилинади. Бунда аҳоли эҳтиёжига етарли даражада ва сифатли озиқ-овқат маҳсулотлари етказиб бериш ҳамда ортиқча исрофгарчиликларнинг олдини олиш чоралари кўрилади.
Аҳолига тўғри овқатланиш қоидалари бўйича тушунтириш олиб борилади. Озиқ-овқат маҳсулотларидан ҳосил бўлган чиқиндилар қайта ишлаш корхоналарига юборилади.
Инвестиция вазирлиги умумий овқатланиш корхоналарида ҳосил бўлган чиқиндиларни йиғиб олиш, қайта ишлаш ва утилизация учун инвестиция маблағларини жалб этиш чораларини кўради.
"Ўзсувтаъминот" 2026 йил 1 июлдан ёғ-мой қолдиқларини тутиб олишга имкон берувчи қурилмаларга эга бўлган овқатланиш корхоналарини марказлашган оқава сув тармоғига уланишига рухсат беради. Овқатланиш корхоналарига газ ёки бошқа ёқилғиларнинг атмосферани ифлослантирувчи моддаларини ушлаб қолувчи ускуналарни ўрнатиш чоралари кўрилади.
Экология вазирлиги уч ой муддатда норматив-ҳуқуқий ҳужжатларни ушбу қарорга мослаштириш чораларини кўради.