Қурилиш вазирлиги соҳадаги коррупцияни танқид қилган тадбиркор устидан ариза киритди

Қурилиш вазирлиги соҳадаги коррупцияни танқид қилган тадбиркор устидан ИИВга ариза киритганини билдирди.

29 август куни қурилиш соҳаси тадбиркорлари билан ўтказилган очиқ мулоқотда ўзини бир нечта қурилиш компаниялари раҳбари сифатида таништирган Усмонжон Абдусамадов "Тошкентда битта уй учун 200 минг долларгача харажат бор”, - дея гапирганди.

"Мазкур маълумотлар ижтимоий тармоқларда турли муҳокамаларни келтириб чиқарди. Натижада қурилиш соҳасида республика миқёсида олиб борилаётган ислоҳотларга, соҳа вакиллари ҳамда Қурилиш ва уй-жой коммунал хўжалиги вазирлигига нисбатан салбий муносабат шаклланмоқда. Бу эса ўз навбатида Вазирлик ва унинг тизимида фаолият юритаётган ходимларнинг шаъни, қадр-қиммати ва ишчанлик обрўсига путур етказмоқда.

Шу боис Қурилиш ва уй-жой коммунал хўжалиги вазирлиги фуқаро (тадбиркор) Усмонжон Абдусамадовга нисбатан тегишли тартибда жавобгарлик чоралари қўлланишини сўраб, Ички ишлар вазирлигига расмий ариза киритганини маълум қилади", дейилади вазирлик хабарида.

Вазирлик қурилиш соҳасига оид барча давлат хизматлари ва тўловлар белгиланган тартибда электрон тарзда амалга оширилишини айтган. Бу жараёнда қўшимча маблағ талаб қилиниши қатъий тақиқланган.

Жисмоний ва юридик шахслар шаҳарсозлик ҳужжатларини олиш учун аризаларни фақат Ягона интерактив давлат хизматлари портали (my.gov.uz) ёки Давлат хизматлари марказлари орқали юборишлари мумкин. Аризаларни кўриб чиқишда фуқаро ва ваколатли орган вакили ўртасида тўғридан-тўғри мулоқотга йўл қўйилмайди. Хусусан, объект қурилишига оид рухсатнома олишдан тортиб, уни фойдаланишга қабул қилишгача бўлган барча жараёнлар “Шаффоф қурилиш” миллий ахборот тизими орқали тўлиқ назорат қилинади.

Бу жараёнлар Вазирлар Маҳкамасининг 2022 йил 20 апрельдаги 200-сон қарори билан тасдиқланган маъмурий регламентлар асосида аниқ тартибга солинган, дея хулоса қилади вазирлик.