“Ҳамма имконият бор. Фақат ҳаракат қилиш керак” — хоразмлик тадбиркор

Хивада Жамолиддин Рўзметовни кўпчилик “Жамол балиқчи” деб танийди. Бир пайтлар кичик бир жойда иш бошлаган тадбиркор бугун кунига 200–250 кг, мавсумда эса ярим тоннагача балиқ сотади. У бугунги натижалари ҳақида гапирар экан, Президентнинг одамлар дардини эшитиш ва тадбиркорларга имконият яратиш сиёсати ҳаётида нимани ўзгартирганини содда қилиб айтиб берди.

“Ҳамма имконият бор. Фақат ҳаракат қилиш керак. Оз-оздан олдик, ишимизни кенгайтирдик. Президентимиз имконият берди. Ҳозир банкирлар ҳам “Лаббай, нима керак?” деб турибди. Муаммо бўлса, бир-икки кунда ишинг битади”, — дейди у.

Жамолиддин Рўзметов бугун янада каттароқ мақсад қўйган — Хоразм балиғини дунёга танитиш. Унинг айтишича, хорижлик сайёҳлар ҳам бу ерга келиб, Хоразм балиғини севиб истеъмол қилмоқда.

Аммо тадбиркор учун бу меҳнатнинг энг катта натижаси фақат даромад ёки кенгайган бизнес эмас. Унинг уч қизи ҳам бугун институтда ўқийди. Ота уларнинг контрактини тўлаб, ўзи эришмаган имкониятни фарзандларига беришга ҳаракат қиляпти.

“Қаердан бўлса ҳам топиб қизларимни ўқитаман. Олий маълумотли бўлсин. Бизлар ўқимадик, улар ўқисин”, — деди тадбиркор.

Бу — Президентнинг тадбиркорларни қўллаб-қувватлаш сиёсати оддий инсон ҳаётини қандай ўзгартираётганига бир мисол. Кеча кичик жойда бошланган иш бугун кунига юзлаб килограмм маҳсулот сотиладиган бизнесга айланди. Энди мақсад ҳам катта — Хоразм балиғини дунёга танитиш. Энг муҳими, шу меҳнат ортидан уч нафар қиз бугун олий таълим олмоқда.

Контент марказининг янги “Иродали инсонлар” лойиҳаси — яратилаётган имкониятлардан фойдаланиб, ўз меҳнати билан ҳаётини, оиласи келажагини ўзгартираётган инсонлар ҳақида.