Андижонда икки нафар ҳоким ўринбосари қўлга олинди

Андижоннинг Бўстон туманида бирйўла икки ҳоким ўринбосари қўлга тушди. Бу ҳақда ДХХ хабарида маълум қилинди.

Айтилишича, туман ҳокимининг инвестиция масалалари бўйича ўринбосари ва қишлоқ хўжалиги масалалари бўйича ўринбосари коррупцияда айбланиб ушланган.

Икки ўринбосар ўзаро тил бириктириб, туманда фаолият юритувчи фермер хўжалигининг 500 минг долларлик экспорт режасини фиктив операциялар орқали ёпиб бериш учун фуқародан 65 млн сўм пора талаб қилган.

Жорий йил август ойида Бўстон ҳокимининг қишлоқ хўжалиги масалалари бўйича ўринбосари аванс тариқасида 25 млн сўм олган. У қолган 40 млн сўмни ҳокимнинг инвестиция масалалари бўйича ўринбосари орқали олган вақтида ушланган.

Ушбу иш юзасидан ЖКнинг 210-моддаси бўйича иш очилиб, қамоққа олинган.

Шунингдек, Тошкентда 900 минг долларга ер сотмоқчи бўлганлар ушланди. Давлат хавфсизлик хизматининг колл-марказига фуқародан ариза келиб тушган. Унда икки шахс Тошкент шаҳри Сергели туманидаги МЧЖга тегишли бир гектар ер майдонининг тоифасини ўзгартириш ва ушбу ҳудудда кўп қаватли уй қуриш учун рухсат олишда ҳокимиятда ишлайдиган юқори лавозимли танишлари орқали ёрдам беришни ваъда қилиб, 900 минг АҚШ доллари талаб қилган.

Жорий йилнинг 5 сентябр куни Тошкент шаҳри Миробод туманида ўтказилган тезкор тадбир давомида улар аванс сифатида 220 минг АҚШ доллари олаётган вақтда ашёвий далиллар билан қўлга олинган.

Фирибгарларга нисбатан Ўзбекистон Жиноят кодексининг 168-моддаси 4-қисми "а" банди ва 211-моддаси 3-қисми "а" банди бўйича жиноят иши қўзғатилиб, қамоққа олиш эҳтиёт чораси қўлланилган.

Бир неча кун аввал Наманган шаҳар ҳокими қамоққа олинганди.

У эскирган турар-жой бинолари ўрнига кўп қаватли уй барпо этиш ҳуқуқини олиб бериш ва молиялаштириш эвазига 60 минг доллар талаб қилгани айтилмоқда.