Зеленский АҚШда: Украина масаласида муҳим учрашувлар ўтказилди

Украина президенти Владимир Зеленский Оқ Уйда АҚШ президенти Доналд Трамп билан учрашди.

Февралдаги жанжалли вазиятдан фарқли ўлароқ учрашув тинч ва конструктив ўтган.

Асосий баёнотлар:

Трамп:

Трамп Зеленский ва Россия президенти Владимир Путин ўртасидаги уч томонлама учрашувга умид қилишини яна бир бор таъкидлади:

“Агар бугун ҳаммаси яхши бўлса, биз уч томонлама учрашув ўтказамиз ва менимча, урушни тугатиш учун ҳақиқий имконият бор”.

Шунингдек, у Путин урушни тугатишни хоҳлаётганига ишонишини қўшимча қилди.

Трамп агар тинчлик келишувига эришилса, америкалик тинчликпарвар кучларни Украинага юборишга рози бўладими, деган саволга жавоб беришдан бош тортди, лекин у узоқ муддатли тинчлик ўрнатиш йўлида ишлашни режалаштираётганини таъкидлади:

“Биз ҳамма билан ишлаймиз ва тинчлик бўлса, бу узоқ давом этишига ишонч ҳосил қиламиз. Унинг ишлашига ишонч ҳосил қиламиз, биз Украина билан ишлаймиз ва агар биз тинчликка эриша олсак, мен бунга шубҳа қилмайман.

Трамп Европа етакчилари билан музокаралар чоғида Украинага ҳарбий ёрдам кўрсатиш масаласи муҳокама қилинишини айтди. "Биз бу ҳақда гаплашамиз. Улар [Европа давлатлари] ҳаммаси иштирок этади. Кўп ёрдам бўлади ... Бу яхши бўлади. Улар [Европа] биринчи мудофаа чизиғи, чунки улар у ерда, улар Европа. Лекин биз уларга ёрдам берамиз ".

Трамп ҳозирда Россия ва Украина ўртасида тинчлик келишуви тарафдори эканини айтди:

"Менга ўт очишни тўхтатиш тушунчаси бир сабабга кўра ёқади: бу одамларнинг ўлимини бир-икки ҳафтада ёки қанча вақт талаб қилса ҳам, зудлик билан тўхтатиб қўяди. Лекин улар урушаётган пайтда тинчлик келишувини муҳокама қилишимиз мумкин. Улар жанг қилишлари керак. Қанийди, тўхтасалар. Тўхтасалар эди, лекин стратегик жиҳатдан бу иккала томон учун яхши бўлмаслиги мумкин”.

Трамп Украина иттифоқчилардан хавфсизлик кафолатларини олишини айтди, бироқ улар НАТОнинг 5-моддасига ўхшаш бўладими ёки йўқлигини айтмади.

Трамп АҚШ энди Украинага қурол-яроғни текин етказиб бермаслигини айтди: “Биз ҳозир ҳеч нарса бермаяпмиз, қурол сотяпмиз...”

Зеленский:

Зеленский Украина сайловларни ўтказишга тайёр эканини айтди:

"Улар хавфсиз шароитда ўтказилиши керак. Биз парламентда ишлашимиз керак, чунки уруш пайтида сайловлар ўтказилмайди. Лекин биз хавфсизликни таъминлай оламиз. Бизга ҳамма жойда – жанг майдонида, ҳавода, денгизда ўт очишни тўхтатиш керак, токи одамлар демократик, очиқ, қонуний сайловларга келиш имкониятига эга бўлсинлар".

Украинага АҚШдан қандай хавфсизлик кафолатлари керак - Америка қўшинлари, разведка, қуроллар деган саволга Зеленский: "Ҳаммаси" деб жавоб берди.

Америка оммавий ахборот воситалари Трампнинг Зеленский билан учрашувини қандай тасвирлайди?

“Зеленский бугун Трамп билан биринчи марта омма олдида чиқиш қилди”, — деб ёзади The New York Times. Украина президентининг феврал ойида Оқ уйга ташрифи икки етакчи ўртасида оммавий мунозара билан якунланган.

NYT таъкидлашича, Зеленский ҳам одатдаги ҳарбий формасидан воз кечиб, учрашувга янада расмий костюмда: қора кўйлаги ва шимда келган. Ўтган сафар Трамп қора узун енгли поло ва шим кийган Зеленскийнинг суратини киноя билан изоҳлаган эди.

CNN таъкидлашича, бу сафар Овал кабинетдаги муҳит "анча дўстона" эди. "Украина томони музокаралар тўғри йўналишда ўтишини таъминлашга катта эътибор қаратгани кўриниб турибди. Зеленский Трампга рафиқасидан мактуб олиб келди ва АҚШнинг биринчи хоними Мелания Трампнинг Путинга уруш пайтида азоб чекаётган болалар ҳақидаги мактубини юқори баҳолади", — дейилади телеканал хабарида.

Шунингдек, томонлар Европа етакчилари билан ҳам учрашувлар ўтказди.

Орада Трамп Путинга қўнғироқ қилган ва у билан уч томонлама учрашувни муҳокама қилган. Хабарларга кўра, уч томонлама уучрашув икки ҳафта ичида ташкил этилиши мумкин.

Шунингдек, Зеленский ҳудудлар масаласини фақат Путин билан муҳокама қилиши мумкинлишини айтди.