Зеленский Оқ Уйдаги жанжал сабаб Трампдан узр сўради
Бу ҳақда Трампнинг махсус вакили Стив Уиткофф маълум қилди. Зеленский АҚШ раҳбарига хат ёзган.
Оқ уйдаги жанжалдан кейин Украина президенти Владимир Зеленский АҚШ раҳбари Доналд Трампдан кечирим сўради.
Бу ҳақда Трампнинг махсус вакили Стив Уиткофф айтди.
Унинг сўзларига кўра, Украина президенти Доналд Трампга мактуб йўллаган ва “бу муҳим қадам бўлди”, дея маълум қилди Fox News.
"Бизнинг жамоаларимиз, украиналиклар ва европаликлар ўртасида кўплаб муҳокамалар бўлиб ўтди, улар ҳам ушбу муҳокамага тегишли. Ва мен буни тараққиёт деб атамоқчиман. Умид қиламанки, келишувга эришилади”, - деди Стив Уиткофф.
Зеленскийнинг феврал ойи охирида Вашингтонда Трамп билан учрашуви келишмовчилик билан якунланган эди. Украина президенти Оқ уйни режалаштирилганидан эрта тарк этди ва ноёб тупроқ металлари бўйича келишув имзоланиши ҳам бекор қилинди.
10 март куни Зеленский валиаҳд шаҳзода Муҳаммад бин Салмон билан учрашиш учун Саудия Арабистонига келди.
11 март куни Украина ва АҚШ ўртасида Россия-Украина можаросини ҳал қилиш бўйича янги музокаралар бўлиб ўтади.
АҚШ Давлат котиби Марко Рубио Саудия Арабистонида украиналиклар билан бўлиб ўтган учрашув натижалари АҚШГА “ёқса” бўлса, Американинг Киевга ҳарбий ёрдами қайта тикланишини айтди: “Ўйлайманки, агар у ерда бизга ёқадиган ва президентга ҳисобот берадиган яхши учрашув бўлса, менимча, пауза (ҳарбий ёрдам) бўйича қарорлар қабул қилинади”, деди Рубио.
Давлат котиби, шунингдек, Қўшма Штатлар ҳали ҳам табиий ресурслар бўйича битим тузишга умид қилаётганини, аммо унинг тафсилотлари тўлиқ ишлаб чиқилмаганини таъкидлади.
