"Аэрофлот" авиакомпанияси тизимида оммавий носозлик рўй берди

Россиянинг "Аэрофлот" авиакомпанияси ахборот тизимларидаги оммавий носозлик юз берди.

Носозлик туфайли қатор парвозлар оммавий равишда бекор қилинди. Муаммолар мамлакат бўйлаб ва хориждаги ўнлаб йўналишларга, жумладан, Екатеринбург, Минск, Калининград, Сочи, Ереван ва бошқа шаҳарларга рейсларга таъсир қилди.

Бекор қилинган рейслар орасида машҳур йўналишлар ҳам бор эди: Москва - Астрахан, Грозний, Екатеринбург, Қозон, Калининград, Красноярск, Махачқалъа, Минерал Сувлар, Минск, Мурманск, Омск, Оренбург, Орск, Перм, Самара, Сочи, Санкт-Петербург, Ставропол, Тюмен, Улябинск.

Тўлиқ рўйхат авиакомпания матбуот хизматининг расмий телеграм-каналида эълон қилинган. Жами 42 та рейс бекор қилинган.

"Аэрофлот" бекор қилинган рейслар йўловчиларига Шереметево аэропортидаги онлайн таблодаги янгиланишларни диққат билан кузатишни ва даъво зонасида олдиндан рўйхатдан ўтган багажни зудлик билан йиғишни тавсия қилди.

Одамлар гавжум бўлишининг олдини олиш учун йўловчилардан юкларини олгандан кейин аэропорт биносини тарк этишлари сўралади.

Бекор қилинган рейслар йўловчилари кейинги 10 кун давомида тўловларини қайтаришлари ёки чипталарни қайта расмийлаштиришлари мумкин. Аэропортдаги чипта кассалари вақтинча чипталарни қайтариб бермайди ёки қайта расмийлаштирмайди.

Агар чипта агентлик орқали сотиб олинган бўлса, пулни қайтариш ёки қайта расмийлаштириш сотиб олинган жойда амалга оширилиши керак.

Сўнгги маълумотларга кўра, носозликларга хакерлик ҳужумлари сабаб бўлган.

“Аэрофлот”тизимида хакерлик ҳужуми натижасида юзага келган вазият сабаб компютер маълумотларига ноқонуний кириш бўйича жиноий иш қўзғатилди, деб хабар қилди Бош прокуратура.

"Россия Бош прокуратурасининг топшириғига кўра, Шереметево аэропортида парвозларнинг кечиктирилиши ва бекор қилиниши муносабати билан назорат чоралари ташкил этилди. Бунга хакерлик ҳужуми натижасида "Аэрофлот" ахборот тизимининг ишламай қолиши сабаб бўлган", дейилади расмий хабарда.