Бангладешда ҳарбий самолёт мактаб устига қулади
Ҳозиргача камида 27 киши қурбон бўлган. Ўнлаб кишилар шифохоналарга ётқизилди.
Бангладеш Ҳарбий-ҳаво кучларига тегишли ўқув самолёти пойтахт Даккадаги мактаб кампусига қулади.
Оқибатда камида 27 киши ҳалок бўлди, 170 дан ортиқ киши жароҳатланди.
“Жами 27 киши, жумладан, 25 нафар бола ва бир учувчи ҳалок бўлди”, — деди мамлакат соғлиқни сақлаш вазирлиги матбуот котиби Саедур Раҳмон. “78 киши турли шифохоналарда даволанмоқда”, — дея унинг сўзларини келтиради AFP.
Расмийларга кўра, самолётда техник носозлик юзага келган, учувчи мунтазам машғулот парвозини амалга ошираётган эди. Ҳалокатнинг аниқ сабаблари ўрганилмоқда.
BBC билан суҳбатлашган гувоҳларнинг сўзларига кўра, самолёт тўғридан-тўғри икки қаватли Milestone мактаби ва коллежига қулаган. Уттара шимолидаги мактабдан олинган видеокузатув камералари ҳалокатдан кейин катта ёнғин ва қуюқ тутун ҳосил бўлганини кўрсатди.
Куйишлар ва пластик жарроҳлик миллий институти шифокори журналистларга айтишича, 50 дан ортиқ одам, болалар ва катталар куйиш жароҳати билан шифохонага етказилган.
Воқеа жойидан олинган суратларда ўнлаб қутқарувчилар омон қолганларни топиш учун куйган вайроналарни текшираётгани, оломон эса вазиятни томоша қилиш учун атрофдаги биноларга чиқишганини кўриш мумкин.
Ҳарбийлар ҳодисага ўз самолётларидан бири алоқадорлигини тасдиқлади. "Бангладеш Ҳарбий-ҳаво кучларининг F-7 BGI ўқув самолёти Уттара штатида ҳалокатга учради. Самолёт 13:06 (GMT 07:06) да ҳавога кўтарилганди", — дейилади ҳарбий ҳаво кучлари хабарида.
Пойтахтдаги авиабазадан ҳавога кўтарилган учувчи механик муаммога дуч келганидан сўнг самолётни сийракроқ аҳоли пунктига олиб бориб қўндиришга уринган.
Эслатиб ўтамиз, аввалроқ Ветнамда сайёҳлар кемаси ағдарилиб, 34 киши ҳалок бўлганди.