Трамп Мексика ва ЕИ товарларига 30 фоизлик божлар жорий этди
Европа Иттифоқи АҚШнинг энг асосий ҳамкорларидан саналади. Трамп ЕИ жавоб қайтарса, шартларни янада оғирлаштиришини айтган.
Трамп Мексика ва ЕИ товарларига 30 фоизлик божлар жорий қилди: савдо уруши давом этмоқда.
Бу ҳақда АҚШ президенти ўзининг Truth Social ижтимоий тармоғида эълон қилган ушбу мамлакатлар раҳбарларига йўллаган очиқ хатларида ёзган.
"Европа Иттифоқи Қўшма Штатларга тўлиқ ва очиқ бозорга кириш ҳуқуқини беради ёки сиз (тарифларни) оширишга қарор қилган ҳар қандай миқдор биз жорий этган 30 фоизга қўшилади", деди Трамп.
Тарифларнинг ошиши савдо битимларини қайта кўриб чиқиш бўйича кенгроқ кампаниянинг бир қисми эди. Апрел ойи бошида Трамп 185 мамлакат учун 10% минимал базавий ставкани эълон қилди ва музокаралар учун уч ой вақт берди.
Европа комиссияси раҳбари Урсула фон дер Ляйенга йўллаган мактубида у “қаттиқ” сценарийга тайёрлигини тасдиқлади. Бироқ, ЕИ музокараларга умид билдирди ва муваффақиятсизликка учраган тақдирда Америка товарларига қарши жавоб чоралари пакети жорий этилиши ҳақида огоҳлантирди. Брюсселда жавоб тарифлари аллақачон тайёрланмоқда.
АҚШ президенти Мексикани “кучсиз чегара назорати” ва наркотик картелларига қарши суст курашда айблади ва савдо камомадидан шикоят қилди.
Трампнинг сўзларига кўра, агар Мексика томони жавоб чораларини кўришга қарор қилса, унинг товарларига божлар янада оширилиши мумкин.
Мексика ва Европа Иттифоқи учун тарифларни ошириш ягона қарор эмас. Шу ҳафтада Трамп Канада учун 35%, Бразилия учун 50% тарифларни, шунингдек Қозоғистон, Япония, Жанубий Корея, Жанубий Африка ва бошқа давлатлар учун янги чекловларни эълон қилди.