Россиянинг ишдан бўшатилган транспорт вазири ўлик ҳолда топилди
У ўз жонига қасд қилгани айтилмоқда. Роман Старовойт аввал Курск вилоятини бошқарган.
Бугун, 7 июл куни истеъфога чиқиши маълум бўлган Россиянинг собиқ транспорт вазири Роман Старовойт ўлик ҳолда топилди.
Амалдор Москва вилоятининг Одинцово шаҳрида ўз жонига қасд қилгани айтилмоқда.
Бу ҳақда 7 июл куни манбаларга асосланиб, “Коммерсант” нашри хабар берди. Фожиали ўлим ҳақида РИА "Новости" ва бошқа нашрлар ҳам ёзган.
Россия Телеграм каналлари иддао қилишича, бир миллиард рубллик фирибгарлик ишида ҳибсга олинган Курск вилояти собиқ губернатори Алексей Смирнов гўёки Роман Старовойтга қарши кўрсатма берган.
Старовойт вилоятни 2024 йилнинг майигача бошқарган, Смирнов эса губернаторнинг биринчи ўринбосари ва вилоят ҳукумати раиси бўлган.
2024 йил май ойида у Транспорт вазирлигини бошқарган ва Виталий Савелевни лавозимидан четлатган, у ўз навбатида бош вазир ўринбосари бўлган. Старовоит кўп йиллар давомида йўл соҳасида ишлаган. 2012 йилдан бери у "Росавтодор"ни бошқарган ва 2018 йил сентябр ойида у транспорт вазири ўринбосари лавозимига ўтган.
7 июль куни эрталаб Кремл сайтида Россия президентининг транспорт вазири Роман Старовоитни ишдан бўшатиш ҳақидаги фармони пайдо бўлди.
Кремлнинг таъкидлашича, истеъфо ишончни йўқотиш билан боғлиқ эмас, балки "давлат раҳбарининг қарори" саналади. Старовойтнинг ўринбосари бўлган Андрей Никитин транспорт вазири вазифасини бажарувчи этиб тайинланди.
2005 йилдан 2007 йилгача Старовойт Санкт-Петербург шаҳри маъмуриятининг Инвестициялар ва стратегик лойиҳалар қўмитасининг инвесторлар билан ишлаш бўлими бошлиғи лавозимида ишлаган. 2007-2010 йилларда мазкур қўмита раисининг биринчи ўринбосари бўлган.
2010 йилдан 2012 йилгача у Россия ҳукумати департаментининг саноат ва инфратузилма департаменти директорининг ўринбосари бўлиб ишлаган.
