Трампга қарши импичмент жараёни муваффақиятсизликка учради

АҚШ Конгрессининг Вакиллар палатаси демократ конгрессмен Ал Гриннинг (Техас) президент Доналд Трампга импичмент эълон қилишга чақирувчи резолюциясини рад этди.

Ташаббусга АҚШ ҳарбийларининг Эрон ядровий иншоотларига ҳаво ҳужумлари сабаб бўлган ва бу ҳужумлар Конгресснинг рухсатисиз амалга оширилган.

CNN маълумотларига кўра, Грин резолюцияси учун атиги 79 нафар демократ овоз берган, 344 нафар конгрессмен, жумладан, барча республикачилар ва Демократик партиянинг 128 вакили қарши овоз берган.

Грин ҳужжатни 24 июн куни тақдим этди. Унда конгрессмен президентни ўз ваколатини суиистеъмол қилишда айблаб, Трамп АҚШга бевосита таҳдид бўлмаганига қарамай, Конгресс рухсатисиз ҳаракат қилганини таъкидлади.

Конгрессменнинг айтишича, бу каби ҳаракатлар Америка демократияси асосларига путур етказади ва мамлакатни авторитаризм йўлига олиб боради.

Демократ Александрия Окасио-Кортес аввалроқ давлат раҳбарига нисбатан худди шундай танқид қилган эди. 22 июн куни у Конгресснинг рухсатисиз Эронга қарши ҳарбий чора кўриш қарори “импичмент учун мутлақ ва аниқ асос” эканини айтди.

Доналд Трамп 2019 йил декабрида, президентлик фаолиятининг биринчи давридаёқ импичмент жараёнининг асосий мавзуси бўлган эди.

Кейин у ҳокимиятни суиистеъмол қилиш ва Конгресс ишига тўсқинлик қилишда айбланган. Иккала модда ҳам Вакиллар палатаси томонидан маъқулланган, аммо 2020 йил феврал ойида Сенат импичментни тасдиқламай, президентни оқлади.

Жорий ташаббус Эрон ва Исроил ўртасидаги зиддият кескин кучайган бир пайтда пайдо бўлди. 13 июн куни Исроил армияси Эрон ядро иншоотларига зарба бериб, ядровий тадқиқотлар билан шуғулланган бир қатор юқори мартабали эронлик ҳарбий хизматчилар ва олимларни ўлдирди. Бунга жавобан Теҳрон Тел-Авивга ракета ва дронларни учирди.

22 июн куни Қўшма Штатлар операцияга қўшилди ва Эроннинг учта асосий ядровий объектларига - Фордо, Натанз ва Исфаҳонга ҳаво ҳужумларини бошлади, шундан сўнг Теҳрон ва Тел-Авив ўт очишни тўхтатишни эълон қилди.