G7 саммити: Трамп кутилмаганда ортга қайтди, Британия Россияга қарши чекловларни кучайтиради
Трамп саммитни тарк этгани Исроил ва Эрон тўқнашувлари билан боғлиқ.
16 июн, душанба куни АҚШ президенти Доналд Трамп Канаданинг Кананаскис шаҳрида бўлиб ўтадиган G7 саммитидаги иштирокини зудлик билан тўхтатишга қарор қилди.
Бу қарорга Яқин Шарқдаги вазият сабаб бўлди, деб хабар қилди Оқ уй матбуот хизмати.
Трампнинг матбуот котиби Каролин Лейвитт Х ижтимоий тармоғида Америка етакчиси саммитда Буюк Британия бош вазири Кир Стармер билан йирик савдо битимини имзолаган ҳолда “кунни ажойиб ўтказганини” ёзди.
“Кўп ишлар амалга оширилди, бироқ Яқин Шарқда содир бўлаётган воқеалар туфайли президент Трамп бугун кечқурун давлат раҳбарлари билан кечки овқатдан кейин жўнаб кетади”, — деди Лейвитт.
CBC News телеканалининг хабар беришича, АҚШ Давлат котиби Марко Рубио Оқ уй раҳбари билан бирга Канададан Вашингтонга учган.
CNN хабарига кўра, Трамп ўз маъмуриятининг миллий хавфсизлик учун масъул ходимларига Вашингтондаги Оқ уйдаги вазият хонасига йиғилишни буюрган. Бу АҚШ президенти, унинг маслаҳатчилари, ҳарбий ва разведка хизматлари вакиллари томонидан инқирозли вазиятларда шошилинч йиғилишлар ўтказиш учун фойдаланиладиган хоналар мажмуасидир.
Хонага ўрнатилган алоқа ускуналари давлат раҳбарига бутун дунё бўйлаб Америка қўшинларига қўмондонлик қилиш имконини беради.
Лейвиттнинг хабаридан тахминан бир соат олдин Америка етакчиси ўзининг Truth Social ижтимоий тармоғида пост эълон қилди ва унда “Эрон ядро қуролига эга бўлмаслиги керак” деб яна бир бор таъкидлади. “Ҳамма Теҳронни зудлик билан эвакуация қилиши керак”, деб ёзган АҚШ президенти.
Стармердан ташқари, АҚШ президенти Кананаскис саммити доирасида Германия канцлери Фридрих Мерц билан ҳам 20 дақиқалик суҳбат ўтказди. Икки етакчи Исроил ва Эрон ўртасида тўртинчи кундан бери давом этаётган давом этаётган жанговар ҳаракатларни муҳокама қилиб, кескинлашувни тўхтатиш йўлларини излаш зарурлиги ва Эрон ядровий дастурини тўхтатиш зарурлиги ҳақида келишиб олди.
17 июн, сешанба куни Трамп G7 саммитида Мексика ва Украина президентлари Клаудия Шейнбаум ва Владимир Зеленский билан ҳам учрашувлар ўтказиши лозим эди. Бироқ, бу учрашувлар энди бўлиб ўтмайди.
Франция президенти Эммануэл Макрон Оқ уй раҳбарининг Исроил ва Эрон ўртасида ўт очишни тўхтатишга ваъда бергани контекстида Трампнинг фавқулодда вазиятда Вашингтонга жўнаб кетиши “ижобий янгилик” деган фикрни билдирди.
G7 саммитида бўлиб турган Британия бош вазири Кир Стармер Россияга қарши чекловни кучайтиришини маълум қилди. Унинг айтишича, бу Россияни ўт очишни тўхтатишга ундаши мумкин.