Футболчиларга BYD автомобиллари совға қилинади
Ушбу совғалар терма жамоа аъзолари шарафига ўтказиладиган тантанали маросимда топширилади.
ЖЧга йўл олган футболчиларга машина берилади.
Бироздан сўнг улкан ғалаба — Ўзбекистон тарихида илк бор жаҳон чемпионати йўлланмасини қўлга киритган миллий терма жамоа Бирлашган Араб Амирликларидан Тошкентга қайтиб келади.
Осиёнинг энг кучли жамоалари иштирок этган саралаш мусобақаларида чинакам жасорат ва матонат кўрсатган футболчиларимизнинг хизматлари муносиб эътироф этилди. Кечаги ўйиндан сўнг давлатимиз раҳбари биринчи бўлиб уларга қўнғироқ қилди ва тарихий натижа билан табрикладилар. Бугун эса футболчилар ва мураббийлардан бир гуруҳини фахрий унвон, орден ва медаллар билан мукофотлаш тўғрисида фармон имзоладилар.
Пойтахтимизда минглаб юртдошларимиз йигитларимизни тантанали кутиб олишга шай турибди. Терма жамоа аъзолари шарафига ўтказиладиган тантанали маросимда уларга Президент совғаси - BYD автомобиллари топширилади", дейилади президент матбуот хизмати хабарида.