Трамп 12 давлат фуқароларининг АҚШга киришини тақиқлади
Бурунди, Куба, Лаос, Серра-Леоне, Того, Венесуэла ва Туркманистон фуқаролари учун эса чекловлар жорий этилди.
Доналд Трамп 12 давлат фуқароларининг АҚШга киришини тақиқлади.
АҚШ президенти Доналд Трамп Осиё, Африка ва Лотин Америкасидаги 12 давлат фуқароларининг АҚШга киришини тақиқловчи ва яна етти давлат фуқароларининг киришини чекловчи фармонни имзолади.
Оқ уй маълумотларига кўра, Афғонистон, Мянма, Чад, Конго Республикаси, Экваториал Гвинея, Эритрея, Гаити, Эрон, Ливия, Сомали, Судан ва Яман фуқаролари учун АҚШга кириш тақиқланган.
Тақиқ 9 июндан кучга киради.
Бурунди, Куба, Лаос, Серра-Леоне, Того, Венесуэла ва Туркманистон фуқаролари учун АҚШга кириш қисман чекланган.
Доналд Трамп ўзининг биринчи муддатида баъзи мамлакатлар фуқароларига киришни тақиқлашни жорий қилганди — бу унинг 2017 йилда президент сифатидаги биринчи қарорларидан бири эди.
Кейин Трамп Ливия, Сурия, Яман ва Сомали фуқароларига АҚШ чегарасини кесиб ўтиш ҳуқуқини рад этди. Кейинчалик бу рўйхатга Шимолий Корея, Венесуэла ва Чад қўшилди.
Ушбу тақиққа кўп марта судда эътироз билдирилди, ўзгартирилди, аммо охир-оқибат тасдиқланди - АҚШ Олий суди кўпчилик овоз билан уни Конституцияга мувофиқ деб топди.