Самарқанд ва Хоразмда бюджетдан млрдлаб маблағ ажратилади

Самарқанд ва Хоразм вилоятларида турли харажатлар учун бюджетдан пул ажратилади.

Биринчи ҳужжат 2025 йил 29 апрел куни имзоланган бўлиб, унда 4 млрд 38 млн сўм маблағ кўзда тутилган. Шундан Самарқанддаги 7 та маҳаллада ҳуқуқ-тартибот масканлари учун 3,5 млрд сўм, футбол ассосиациясини 2025 йилда сақлаш харажатлари учун 538 млн сўм берилади.

Иккинчи ҳужжатнинг умумий миқдори қарийб 5 млрд сўмни ташкил этади. Кредитор қарзлари учун 1 млрд 32 млн сўм, Самарқанд шаҳрида сув таъминоти тизимини яхшилаш учун 2 млрд 654 млн сўм, вилоят ҳокимлиги ходимларига ахборот-коммуникация технологияларини ривожлантириш ҳамда ахборот хавфсизлигини таъминлаш ва дастурий маҳсулотларни ишлаб чиқиш ҳамда татбиқ этиш, хизмат фаолиятида юқори интернет хизматларидан фойдаланишда тезкор маълумотларни алмашиш харажатларига 2025 йил апрел-декабр ойлари учун 1 млрд 249 млн берилади.

Хоразм футбол клуби стадионининг майдонидаги чим қопламасини янгисига алмаштириш ва стадионни видео ассистент рефери (VAR) техникаси билан жиҳозлаш ҳамда бошқа харажатлар учун 2 440 000 000 (икки миллиард тўрт юз қирқ миллион) сўм ажратилади. Пул вилоят маҳаллий бюджетининг 2025 йил 1-чорак даромадлар режаси ошириб бажарилган қисми ҳисобидан вилоят ҳокимлигига тақдим этилади.