Яҳудий талабалар Трампнинг ёнини олмоқда
21 апрел куни Ҳарвард расмий равишда Трамп маъмуриятига қарши судга мурожаат қилди. Университет Оқ уйни ўз қарорларига аралашишда ва конституциявий ҳуқуқларни поймол қилишда айблади.
Ҳарвард университетининг яҳудий талабалари президент Доналд Трампнинг судга берилганига изоҳ берди.
Ҳарвард университети президент Доналд Трамп маъмуриятини молиялаштиришни тўхтатгани учун судга бергач, университетнинг яҳудий талабалари ва собиқ битирувчилари бунга муносабат билдирди. Улар университетнинг ҳаракатини қоралаб, антисемитизм муаммосини ҳал қилишга жиддий эътибор қаратиши лозимлигини таъкидладилар.
Маълумот учун, АҚШ ҳукумати муросага бормайдиган олийгоҳларни молиялаштиришдан бош тортади. Бунгача, Обама маъмурияти ҳам бир неча марта мактабларга нисбатан молиявий чораларни қўллаган эди.
“Трампнинг бу ҳаракати олий таълимга хавф солмайди. Агар Ҳарвард АҚШ бюджетидан ажратиладиган маблағни олишни истаса, қонунларга бўйсуниши керак,” — деди Ҳарвард талабаси Шаббос Кестенбаум Fox Newsʼга.
Кестенбаумнинг айтишича, у университетни судга берган, чунки олийгоҳ антисемитик ҳолатларни бартараф эта олмаган ва унга таҳдид солувчи вазиятларни эътиборсиз қолдирган.
Эслатиб ўтамиз, Ҳарварднинг собиқ президенти Клодин Гей 2024 йил январ ойида лавозимидан озод этилган эди. У яҳудийларга қарши геноцидга чақириқлар университет ахлоқ кодексига зид эмаслигини билдирганидан сўнг кенг жамоатчилик танқидига учраган.
2025 йил 11 апрел куни Трамп маъмуриятида антисемитизмга қарши кураш бўйича вакил Шон Кевеней Ҳарвардга расмий хат юборган эди. Унда университетда антисемитизм, ирқчилик ва дискриминацияга қарши курашиш чоралари кўрилиши лозимлиги қайд этилган.
Ҳарвард Трамп томонидан илгари сурилган талабларни рад этганидан сўнг, маъмурият 2,2 миллиард долларлик маблағни музлатиб қўйиши ва университетга солиқ солиниши мумкинлиги ҳақида огоҳлантирди.
2025 йил 21 апрел куни Ҳарвард расмий равишда Трамп маъмуриятига қарши судга мурожаат қилди. Университет Оқ уйни ўз мустақиллигини бузишда, қарорларига аралашишда ва конституциявий ҳуқуқларини поймол қилишда айблади.
“Бундай ҳукумат аралашуви жиддий ва узоқ муддатли оқибатларга олиб келади. Трамп сиёсати туфайли саратон билан касалланган болаларни даволашга йўналтирилган тадқиқотлар, шунингдек, саратоннинг танада қандай тарқалишини ўрганишга қаратилган илмий ишлар хавф остида қолди,” — деди Ҳарвард президенти Алан Гарбер.
Университетнинг иккинчи босқичида таҳсил олаётган яҳудий талабалардан бири Трамп маъмуриятининг молиялаштиришни тўхтатиш қарорига қўшилмаслигини, бироқ Ҳарвард университети ҳам антисемитизм ва Исроилга қарши кайфиятларга чек қўйиши лозимлигини таъкидлади.
Исроиллик тадбиркор Матан Яффе 2022 йилда Ҳарварднинг Кеннеди мактабида таҳсил олган бўлиб, университетда ҳақиқатдан ҳам антисемитик ва Исроилга қарши бўлган қарашлар борлигини, профессор ўқитувчилар ва синфдошлари билан муносабатларда бу каби ҳолатлар кузатилганини иддао қилди ва Трамп маъмуриятининг қарори қўллаб-қувватлашини билдирди.