Ҳар 18 ойда Орол маданият саммити ўтказилади

2025 йилдан бошлаб ҳар ўн саккиз ойда – баҳор ёки куз фаслларида Орол маданият саммити ўтказилади.

Саммитни ўтказиш бўйича президент қарори эълон қилинди.

Ушбу ташаббус Оролбўйи минтақасида қулай табиий муҳит яратиш, ҳудуднинг ноёб маданияти ва тарихий меросини асраб-авайлаш ҳамда кенг оммалаштириш, ушбу йўналишларда илмий-тадқиқот ишлари, инновацион лойиҳалар ва ижодий ташаббусларни амалга ошириш учун халқаро ҳамкорлик ва мулоқотни янада кенгайтириш мақсадида илгари сурилган.

Биринчи Орол маданият саммити Самарқанд иқлим форуми билан уйғун ҳолда 2025 йил 4-6 апрел кунлари Самарқанд ва Нукус шаҳарларида ташкил этилади.

Саммитнинг асосий мақсад ва йўналишлари:

а) Оролбўйида ва дунёнинг бошқа минтақаларида юзага келган экологик муаммоларни муҳокама қилиш ҳамда оқилона ечимларни тақдим этиш учун глобал платформа яратиш;

б) Оролбўйи муаммоларини ҳал этишда фанлараро ёндашувни ривожлантириш;

в) барқарор ечимлар ва стратегиялар яратишга қаратилган таълим дастури асосида Орол мактабини ташкил этиш;

г) замонавий технологиялар ва анъанавий меъморчилик асосида “Истиқлол” маданият ва истироҳат боғи, боғ ҳудудида жойлашган болалар кутубхонасини қайта барпо этиш ҳамда улардан самарали фойдаланишни йўлга қўйиш;

д) етакчи маҳаллий ва хорижий мутахассислар ҳамда ташкилотлар билан ҳамкорликда Оролбўйи минтақасида сув ва тупроқ тадқиқотлари олиб бориш;

е) Оролбўйи ҳудудининг тупроқ ва иқлим шароитига мос бўлган қишлоқ хўжалиги экинларини ўрганишга ихтисослашган лаборатория платформасини яратиш ҳамда уни мазкур йўналишда амалга ошириладиган илмий тадқиқотларнинг ўқув-амалиёт майдонига айлантириш;

ж) Оролбўйи минтақасида асрлар давомида шаклланган ноёб маданият ва анъаналарни сақлаш, ҳимоя қилиш ва кенг оммалаштириш;

з) халқаро миқёсда доимий мулоқотлар, амалиётлар, семинарлар, тадқиқот дастурларини ташкил этиш.

Вазирлар Маҳкамаси томонидан Саммитнинг молиялаштириш манбалари белгиланади ҳамда харажатлар сметаси тасдиқланади.