“Тошшаҳартрансхизмат” собиқ раҳбари Анвар Жўраев 7,5 йилга қамалди
Суд ҳукми жорий йилнинг феврал ойида чиқарилган. Жўраев билан бирга яна 20 кишига ҳам ҳукм ўқилди. Бироқ собиқ мансабдор айбларини инкор этган.
“Тошшаҳартрансхизмат” собиқ раҳбари Анвар Жўраев давлат мулкини талон-торож қилиш, мансаб сохтакорлиги каби моддаларда айбдор деб топилиб, 7,5 йилга озодликдан маҳрум қилинди.
Суд ҳукми жорий йилнинг феврал ойида эълон қилинган.
Жиноят ишлари бўйича Олмазор тумани суди биносида 2025 йилнинг 3 феврал куни Анвар Жўраев ва яна 20 кишига нисбатан суд ҳукми чиқарилган.
Анвар Жўраев 3 йил «Тошшаҳартрансхизмат» тизимида мансабдорлик ва моддий жавобгарлик бор лавозимларда ишлаш ҳуқуқидан маҳрум қилиниб, 7 йил 6 ой муддатга озодликдан маҳрум қилинди.
Унга Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш); 184-моддаси 3-қисми (жуда кўп миқдорда солиқлар ёки йиғимларни тўлашдан бўйин товлаш); 184 прим 1-моддаси 2-қисми (жуда кўп миқдорда бюджет ва смета-штат интизомини бузиш); 205-моддаси 2-қисми «а» банди (жуда кўп миқдорда зарар етказган ҳолда ҳокимият ёки мансаб ваколатини суиистеъмол қилиш);209-моддаси 2-қисми «а» банди (такроран мансаб сохтакорлиги); 243-моддаси (жиноий фаолиятдан олинган даромадларни легаллаштириш) каби айбловлар қўйилган. Бироқ у ўзига қўйилган айбларни инкор этган.
«Тошшаҳартрансхизмат» собиқ бошқарув раиси ўринбосари Абдужамил Азизов ҳам 3 йил «Тошшаҳартрансхизмат» тизимида ишлаш ҳуқуқидан маҳрум қилиниб, 7 йил 6 ой муддатга озодликдан маҳрум қилинди.
«Тошавтотаъмирхизмат» раиси Ҳусан Маҳкамов эса 3 йил муддатга «Тошшаҳартрансхизмат» АЖ тизимида мансабдорлик ва моддий жавобгарлик юклатилган лавозимларда ишлаш ҳуқуқидан айрилиб, 5,5 йил муддатга озодликдан маҳрум қилинди. «Тошавтотаъмирхизмат» раиси ўринбосари Аҳмад Алимов ҳам 5,5 йил муддатга озодликдан маҳрум қилинди. У ҳам 3 йил муддатга «Тошшаҳартрансхизмат» АЖ тизимида мансабдорлик ва моддий жавобгарлик юклатилган лавозимларда ишлаш ҳуқуқидан маҳрум бўлди.
«Тошавтотаъмирхизмат» раиси ўринбосари Аҳмад Алимов ҳам 5,5 йил муддатга озодликдан маҳрум қилинди. У ҳам 3 йил муддатга «Тошшаҳартрансхизмат» АЖ тизимида мансабдорлик ва моддий жавобгарлик юклатилган лавозимларда ишлаш ҳуқуқидан маҳрум бўлди. 8-автобус саройининг собиқ раҳбари Бекзод Ибрагимовга 3 йил муддатга «Тошшаҳартрансхизмат» АЖ тизимида мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиб, 2 йил 3 ой 3 кун озодликни чеклаш жазоси тайинланди.
Ҳукм қонуний кучга киргандан сўнг Анвар Жўраев, Абдужамил Азизов, Ҳусан Маҳкамов, Аҳмад Алимов, Ҳабибулло Музаффаров, Козимбек Худоёровдан солидар тартибда Иқтисодиёт ва молия вазирлиги фойдасига 2 млрд 146 млн 309 минг сўм;
Анвар Жўраев, Абдужамил Азизов, Бекзод Ибрагимов, Шуҳрат Аҳмедов, Исмоил Баратов, Нажмиддин Давлатов, Дилшод Тошпўлатов, Шоазиз Аширов ва Равшан Атамуҳаммедовлардан солидар тартибда Иқтисодиёт ва молия вазирлиги фойдасига 905 млн 800 минг сўм;
Абдужамил Азизов, Бекзод Ибрагимов, Шуҳрат Аҳмедов, Суннат Раҳимбердиев, Бахтиёр Шариповлардан солидар тартибда Иқтисодиёт ва молия вазирлиги фойдасига 66 млн 251 минг сўм;
Дилшод Тошпўлатов, Равшан Атамуҳаммедов ва Наргиза Абдураҳмонова ва Бекзод Ибрагимовлардан солидар тартибда Иқтисодиёт ва молия вазирлиги фойдасига 196 млн 471 минг сўм;
Бекзод Ибрагимовдан вазирлик фойдасига 66 млн 654 минг сўм ундириш белгиланган.
Анвар Жўраев 2024 йил феврал ойида қўлга олинганди. Ноябр ойида эса "Тошшаҳартранс"га янги раҳбар тайинланганди.
