Трамп ва Путин Шавкат Мирзиёевни Наврўз билан табриклади
ХХР раиси Си Цзинпин ҳам Ўзбекистон президентини қутлаб, табрик йўллаган.
АҚШ президенти Доналд Трамп ва Россия раҳбари Владимир Путин Ўзбекистон президенти Шавкат Мирзиёевни табриклади.
"Россия-Ўзбекистон муносабатлари стратегик шериклик ва иттифоқчилик руҳида муваффақиятли ривожланмоқда.
Биргаликдаги саъй-ҳаракатларимиз билан ўзаро манфаатли икки томонлама алоқаларни бундан буён ҳам дўст халқларимиз фаровонлиги, Марказий Осиёда хавфсизлик ва барқарорликни мустаҳкамлаш йўлида фаол ривожлантирамиз, деб ишонаман", дейилади Путиннинг табригида.
Доналд Трамп йўллаган табрикда шундай дейилади:
"Мамлакатларимиз ўртасида мустаҳкам ришталар ўрнатилаётганлигини юксак қадрлайман ва Сизнинг изчил ислоҳотлар дастурингизни олқишлайман. Савдо алоқаларимизни кенгайтириш ва замонамизнинг энг йирик муаммоларини ҳал этиш йўлида ҳамкорлик қилишни интиқлик билан кутаман.
Буюк давлатларимиз равнақ сари интилаётган бир пайтда, Америка Қўшма Штатлари Ўзбекистоннинг суверенитети, мустақиллиги ва ҳудудий яхлитлигини доимо қўллаб-қувватлашга содиқ бўлиб қолади".
ХХР раиси Си Цзинпин ҳам Ўзбекистон президентини қутлади.
"Мен Хитой-Ўзбекистон муносабатларини ривожлантиришга катта аҳамият бераман ва яқин дўстлигимизни юксак қадрлайман.
Сиз билан биргаликда барча соҳалардаги ҳамкорликни илгари суриш, Хитой ва Ўзбекистоннинг ягона тақдир ҳамжамиятини барпо этиш ишларини бойитиш учун ҳаракат қилишга тайёрман", дейилади табрикда.
