Мажбурий овоз берилган лойиҳалар "Ташаббусли бюджет"дан четлатилади
Жараён доирасида бундай тарзда овоз беришга жалб этиш мажбурий меҳнат сифатида таснифланади.
"Ташаббусли бюджет"да мажбурий овоз тўпланган лойиҳалар овоз бериш босқичидан четлатилади. Бу ҳақда Иқтисодиёт ва ммолия вазирлиги хабар берди.
Ҳозирда “Ташаббусли буджет” жараёнининг жорий йилги 1-мавсуми доирасида овоз бериш босқичи давом этмоқда.
Ижтимоий тармоқларда Фарғона вилояти Қува туманидаги 37-мактабда мажбурий овоз бериш ҳолатлари юзасидан хабарлар тарқалди.
Мазкур ҳолатлар тегишли ваколатли органлар томонидан ўрганилиб, ҳақиқатан ҳам ушбу мактабда ходимлар мажбурий овоз беришга жалб этилгани тасдиқланган.
Шу муносабат билан, Иқтисодиёт ва молия вазирлиги томонидан мазкур мактабда мажбурий овоз тўпланган лойиҳаларни овоз бериш босқичидан четлатиш юзасидан тегишли туман Халқ депутатлари кенгашига тақдимнома юборилди.
Эслатиб ўтамиз, “Ташаббусли бюджет” жараёни доирасида мажбурий овоз беришга жалб этиш — мажбурий меҳнат сифатида таснифланиши белгиланган.
