АҚШ ва Дания ўртасида уруш чиқиши мумкин - сиёсатчи

АҚШ президенти Доналд Трампнинг Гренландияга даъволари Копенгаген ва Вашингтон ўртасида урушга олиб келиши мумкин.

Бу ҳақда Дания Фолкетинг (парламент) мудофаа қўмитаси раҳбари Расмус Ярлов гапирди. У Трампнинг орол тез орада АҚШ мулкига айланиши ҳақидаги баёнотига шундай изоҳ берди.

Трамп НАТО Бош котиби Марк Рютте билан учрашувда яна Гренландия масаласини кўтарганди.

"Биз НАТО Бош котибининг Трамп билан Гренландия ҳақидаги ҳазилларини маъқулламаймиз. Бу НАТОнинг икки давлати ўртасида уруш бўлишини англатади”, деб ёзган Ярлов Х ижтимоий тармоғида.

Сиёсатчи Гренландияда бўлиб ўтган парламент сайловлари натижаларини ҳам эслади. 12 март кунги овоз бериш натижаларига кўра, мухолифатдаги “Демократлар” партияси ғалаба қозонган. Улар оролнинг Даниядан мустақил бўлишини қўллаб-қувватласа-да, партия етакчилари АҚШГА қўшилишга қарши, дейди Расмус Жарлов.

Доналд Трамп Гренландиянинг АҚШ таркибига кириши истагини бир неча бор билдирган. 5 март куни Конгрессдаги нутқида у Вашингтон оролни “бу ёки бу тарзда” эгаллаб олишига ишонтирди.