"Яшил ҳудуд" ДУК директори Ўрмон хўжалиги агентлиги мутахассиси билан катта маблағни ўзлаштириб юборди

2025 йил 4 март куни жиноят ишлари бўйича Поп тумани судида Наманган вилоят “Яшил ҳудуд” ДУК собиқ раҳбари ва Ўрмон хўжалиги агентлиги мутахассиси иши кўриб чиқилди. Суд иши Platina.uz ихтиёрида мавжуд.

Маълум бўлишича, А.У. 2023 йил 17 апрелдан шу кунга қадар Наманган вилоят “Яшил ҳудуд” ДУК директори бўлган лавозимида ишлаб келган. У хизмат вазифасидан фойдаланиб, жиноят содир этиш йўлига кириб, Ўрмон хўжалиги агентлиги ҳудудлар мониторинги бош мутахассиси И.Х. билан бир гуруҳ бўлиб, қатор жиноятларни содир этган.

Жумладан, буюртмачи Ўрмон хўжалиги агентлиги ва пудратчи Наманган вилоят ҳудудий “Яшил ҳудуд” ДУК ўртасида 1.195.000.000 сўмлик “Яшил боғ”лар барпо этиш бўйича 13 та пудрат шартномалари тузилган. Мазкур шартномалар бўйича 2023 йил 29 декабрда тузилган ҳисобфактураларга асосан буюртмачи томонидан жами 13 та объектда бажарилган ишлар учун 1.087.000.000 сўм маблағлар пудратчи Наманган вилоят “Яшил ҳудуд” ДУК ҳисоб-рақамига ўтказиб берилган.

А.У. эса И.Х билан бир гуруҳ бўлиб, туманларда жами 336.000.000 сўмлик амалда бажарилмаган суғориш тизимидаги ишларни 2023 йил 29 декабрда тузилган ҳисоб-фактураларга такроран сохта маълумотлар киритиб, расмий ҳужжат ҳисобланган ҳисоб-фактураларни қалбакилаштириб, жами 336.000.000 сўмлик жуда кўп миқдордаги бюджет маблағларини ўзлаштириш ва растрата қилиш йўли билан талон-торож қилишган.

Судда ҳар иккала айбланувчи ўз айбига тўлиқ иқрорлик билдирди.

Якуний суд ҳукмига кўра, А.У.га узил-кесил иш ҳақининг йигирма фоизи миқдорини давлат даромади ҳисобига ушлаб қолган ҳолда 2 йил 24 кун ахлоқ тузатиш ишлари жазоси тайинланди.

И.Х.га эса узил-кесил ўташ учун 1 йил мансабдорлик ва моддий жавобгарлик юклатилган лавозимларида ишлаш ҳуқуқидан маҳрум қилиб, базавий ҳисоблаш миқдорининг 55 баравари миқдорида 18.700.000 сўм жарима жазоси тайинланди.

Жарима давлат фойдаси ундирилиши белгиланган. Иш бўйича етказилган зарар тўлиқ қопланган.

Суд иши Олий суд порталидан олинди.