Садир Жапаров ва Эмомали Раҳмон чегара бўйича келишувни имзоладилар
Қирғизистон ва Тожикистон ўртасидаги қарийб 1000 км узунликдаги чегара вақти-вақти билан тўқнашув зонасига айланиб қолганди.
Қирғизистон президенти Садир Жапаров ва Тожикистон президенти Эмомали Раҳмон Бишкекда давлат чегараси ҳақидаги келишувни имзолади. Чегарани делимитация ва демаркация қилиш бўйича музокаралар 2002 йилдан бери давом этиб келаётганди.
Ҳужжат имзоланиши Тожикистон президентининг Бишкекка расмий ташрифи доирасида Қирғизистоннинг “Бирлашиш маркази” давлат қароргоҳида бўлиб ўтди. Музокаралар якунида Жапаров ва Раҳмон қўшма баёнотни имзоладилар.
Хусусан, томонлар икки давлат ўртасидаги иқтисодий ҳамкорликни фаоллаштириш учун барча зарур чораларни кўришга келишиб олдилар.
Феврал ойида икки давлат вакиллари Бишкекда чегаранинг умумий участкасини делимитация қилиш бўйича протокол имзолаган эди.
Ўтган йилнинг декабр ойида Қирғизистоннинг Баткен шаҳрида Тожикистон ва Қирғизистон делегациялари раҳбарларининг чегарани делимитация ва демаркация қилиш бўйича учрашуви бўлиб ўтган эди. Томонлар келишувга эришдилар ва баҳсли ҳудудлар тавсифини якунладилар.
Қирғизистон ва Тожикистон ўртасидаги қарийб 1000 км узунликдаги чегара вақти-вақти билан тўқнашув зонасига айланиб қолган. Энг йирик можаролар 2021 ва 2022 йилларда содир бўлган. 2021 йилда уч кунлик жангларда 36 нафар Қирғизистон ва 19 нафар Тожикистон фуқароси ҳалок бўлди. 2022 йил сентябрьида чегарада икки кун давом этган тўқнашувлар камида 100 кишининг ўлимига сабаб бўлди ва 140 мингга яқин киши уй-жойини тарк этди. Ўша воқеалардан сўнг томонлар чегарани делимитация қилиш бўйича ишларни фаоллаштирдилар.
Давлатлар чегарани биргаликда қўриқлаш, можаро ҳудудидаги йўлни тўсиб қўйишга келишиб олдилар ва тинчлик ўрнатиш тўғрисидаги протоколни имзоладилар.
