Бош прокурор янги ўринбосарининг вазифаси маълум бўлди
Аҳоли бандлигини таъминлашда сусткашликка йўл қўйган 30 нафар раҳбарга нисбатан чоралар кўрилган.
Янги тайинланган Бош прокурор ўринбосари Дилмурод Қосимов тадбиркорлар ва инвесторларнинг қонуний ҳуқуқ ва манфаатлари ҳимояси соҳасидаги назорат учун масъул бўлади. Эндиликда прокуратура идоралари бу борада қулай ҳуқуқий муҳит яратишда муҳим ўрин тутади.
Бугун Шавкат Мирзиёев камбағалликни қисқартириш ва аҳоли бандлигини таъминлаш, инвестиция ва экспорт кўрсаткичлари бўйича ҳисобот билан танишди. Унда Қосимов таништирилди.
Аҳоли бандлигини таъминлашда Жиззах, Самарқанд, Бухоро ва Навоий вилоятларида ҳамда Ўзмиллийбанк, Асакабанк, Микрокредитбанк ва Бизнесни ривожлантириш банки лойиҳаларида юқори кўрсаткичлар қайд этилган.
Лекин Сирдарё вилояти, 24 та туман ва шаҳарда натижалар юқори эмас. Шу боис вазифалар ижросида сусткашликка йўл қўйган 30 нафар раҳбарга нисбатан чоралар кўрилган.
Тўпланган тажрибадан келиб чиқиб, келгуси ойларда натижадорликни ошириш, ишсизларни касбга ва фойдали меҳнатга йўналтириш зарурлиги таъкидланди. Ҳозирги баҳор мавсумида томорқа ва ижара ерларда тўлиқ экин экиш, буни online-mahalla.uz платформаси орқали кузатиб бориш бўйича кўрсатмалар берилди.
