Тошкентда газ портлаши сабаб бир неча киши жабрланди, қурбон бор
Ҳодисага бошқа бир фуқаронинг ўз жонига қасд қилиши сабаб бўлган. У газ плитасини атайлаб ёққан, сўнгра газ-ҳаво аралашмаси чақнаши ва ёнғин содир бўлган.
Тошкентдаги хонадонлардан бирида газ портлади.
Бугун, 1 март куни соат 15:23 да Қорасув-4 даҳасидаги 9 қаватли уйнинг 9-қаватидаги хонадонларнинг бирида газ-ҳаво аралашмаси портлаши натижасида ёнғин юз берди.
Тошкент шаҳар ФВБ маълумотига кўра, ёнғин тўлиқ бартараф этилди.
Тезкор чоралар натижасида 6 киши қутқарилди. Воқеа оқибатида бир неча киши, жумладан икки нафар бола жароҳат олди.
Афсуски, бир бола шифохонага олиб кетилаётганда вафот этди, иккинчиси шифокорлар назорати остида.
Барча жабрланганлар тез тиббий ёрдам ходимларига топширилди.
Ҳозирда воқеа жойида турар-жой биносининг ҳаёт фаолиятини тиклаш ишлари олиб борилмоқда.
Дастлабки маълумотларга кўра, ҳодисага хонадонда яшовчилардан бирининг ўз жонига қасд қилишга уриниши сабаб бўлган. Фуқаро газ плитасини атайлаб ёққан, сўнгра газ-ҳаво аралашмаси чақнаши ва ёнғин содир бўлган. Шундан кейин у ўзини 9-қават деразасидан ташлаб, ҳалок бўлган.
