Тадбиркорлар ва судлар ўртасида электрон маълумот алмашиш йўлга қўйилади
Суд ишларини юритишда қоғоз шаклидан бутунлай воз кечиш мақсадида “Рақамли суд” концепциясини амалга оширилади.
Шавкат Мирзиёев 27 феврал куни суд фаолиятини янада яхшилаш, очиқлик ва рақамлаштириш даражасини ошириш чора-тадбирлари юзасидан йиғилиш ўтказди.
Йиғилишда суд ишларини юритишда қоғоз шаклидан бутунлай воз кечиш мақсадида “Рақамли суд” концепциясини амалга ошириш белгиланди.
Шу мақсадда Олий суд ҳузурида Ахборот технологиялари маркази ташкил этилади. Ушбу марказ судларга зарур ахборот тизимлари ва дастурий маҳсулотларни яратиш, сунъий интеллектни жорий этиш ҳамда ахборот хавфсизлигини таъминлаш билан шуғулланади. Шунингдек, тадбиркорлик субъектлари билан судлар ўртасида электрон маълумот алмашиш йўлга қўйилади, бу эса ишларни кўриб чиқиш тезкорлигини оширади.
Президент судлар ва барча алоқадор ташкилотларнинг ахборот тизимлари интеграциясини таъминлаш муҳимлигини таъкидлади. Бу орқали фуқаролар ва тадбиркорлар учун қулайликлар яратилиб, суд ишларининг самарадорлиги ошиши кутилмоқда.
