Тошкентда сув тошқинларига қарши чоралар учун 11,4 млрд сўм ажратилади
Кураш федерацияси ходимлари иш ҳақи ва уларни сақлаш харажатлари учун 2 млрд 358 млн сўм йўналтирилади.
Халқ депутатлари Тошкент шаҳар кенгаши 21 феврал куни маҳаллий бюджет маблағларини харажатларга йўналтириш бўйича қарорни имзолади.
Унга кўра, маҳаллий бюджетнинг эркин қолдиқ маблағлари ҳисобидан турли харажатлар учун 17 млрд 856 млн сўм ажратилади.
Жумладан, кураш федерацияси ходимлари иш ҳақи ва уларни сақлаш харажатлари учун 2 млрд 358 млн сўм, халқаро кураш институти ходимлари иш ҳақи учун 1 млрд 650 млн сўм, кураш федерацияси Тошкент шаҳар бўлинмасига 1 млрд 188 млн сўм берилади.
Тошкент шаҳрида ёғингарчиликлар даврида сув тошқинлари билан боғлиқ ҳолатларнинг олдини олиш юзасидан амалга ошириладиган қурилиш-таъмирлаш ишлари учун 11 млрд 400 млн сўм берилиши кўзда тутилган.
Кенгашнинг 2025 йил 20 февралдаги маблағ ажратиш бўйича қарори техник сабабга кўра бекор қилинган.
