Тошкентдаги бозорларда кунлик йиғимлар, ижара ва хизматлар нархи ўзгарди

Тошкент шаҳри ҳокими Шавкат Умрзоқовнинг қарори билан пойтахтдаги бозор ва савдо комплексларида ундириладиган бир марталик йиғимлар, ижара тўловлари ва хизматлар нархи оширилди.

Жумладан, бозорларда йиғиб олинадиган йиғим миқдорлари қуйидагича белгиланди: хўл мевалар (узум, анор, олма ва ҳкз) 18 минг сўм (бир кунга 1 ўрин учун). Цитрус мевалар учун бу нарх 39 мингни ташкил этади. Қуруқ мевалар учун 40 минг сўм, зираворлар 29 минг сўм, салқин ичимликлар 80 минг сўм, қурилиш материаллари (6 кв. метргача) 57 минг сўм, 15 кв. метргача 80 минг сўмни ташкил қилади.

Бир бош қорамол учун 49 минг сўм, қўй ва эчкиларга 33 минг сўм тўланади.

Қарорнинг иккинчи иловасида Сергели бозорида транспорт воситалари учун кўрсатиладиган хизматлар нархи келтирилган. Жумладан, автомобилни сотиш учун жой учун тўлов миқдори (жума-якшанба кунлари) бир суткалик нарх 76 минг сўм, юк машиналари учун 85 минг сўмни ташкил этади.

"Ўрикзор" савдо комплексида озиқ-овқат дўконларининг бир метр квадрати учун ойлик тўлов 204 минг сўм, ноозиқ-овқат маҳсулотлари учун (1-2-3 блоклар) 170 минг сўм, қолганлари учун 162 минг сўмни ташкил қилади.

Бозорлар ва савдо комплекслари балансидаги иншоотлардан фойдаланганда бир кв метр нархи ойлик тўлов қуйидагича: озиқ-овқат маҳсулотлари учун Авиасозлар бозорида 98 минг 20 сўм, Миробод бозорида 121 минг сўм, Қўйлиқ деҳқон бозорида 131 минг сўм, Юнусобод деҳқон бозорида 128 минг сўмни ташкил қилади. Қарорнинг 5-иловасида нархлар тўлиқ келтирилган.

Қарор эълон қилинган кун (14 феврал)дан кучга кириши белгиланган.