Макрон Трампнинг сиёсатини электрошокер зарбасига қиёслади
Европа давлатлари мустақил равишда ўз хавфсизлигини таъминлаши ва Украина келажаги учун масъулиятни зиммасига олиши керак, дейди Франция раҳбари.
Франция президенти Эммануэл Макрон Доналд Трампнинг Оқ уйга қайтиши ва унинг давлат раҳбари сифатидаги илк қадамлари Европа Иттифоқи учун электрошокер каби зарба бўлганини айтди.
Франция президентининг фикрича, бу ёндашув Европа давлатларини мустақил равишда ўз хавфсизлигини таъминлашга ва Украина келажаги учун масъулиятни ўз зиммасига олишга ундайди.
“Бу электр токи уришига ўхшайди. Бизга ассиметрик импулслар, ташқи импулслар керак. Европа кучайиши ва ўзи ҳаракат қилиши керак", деди Макрон Financial Times нашрига.
Франция президентининг таъкидлашича, "ўта стратегик ноаниқлик" Европа давлатларини АҚШга қарамликни сақлаб қолиш умидларини қайта кўриб чиқишга мажбур қилиши мумкин. Унга кўра, Европа Иттифоқи Хитой бозорига таянган модел, "Америка ҳарбий соябони" ва Россиядан келаётган арзон газ формуласи энди ишламаяпти.
Макрон Европани Америка қуролларига, хусусан Patriot ҳаво мудофаа тизимларига таянишни бас қилишга чақирди ва европалик ҳамкорларга Франция-Италия SAMP-Т ҳаво мудофаа тизимларини сотиб олишни тавсия қилди.
"Шунингдек, биз Европанинг тўлиқ интеграциялашган мудофаа, саноат ва технологик базасини ривожлантиришимиз керак", — дея қўшимча қилди у.
Эслатиб ўтамиз, Доналд Трамп НАТО мамлакатлари мудофаа харажатларини ялпи ички маҳсулотининг 5 фоизигача оширишини таъминлашга ваъда берди. У, шунингдек, Қўшма Штатлар Украинага ҳарбий ёрдам учун НАТОнинг қолган қисмига қараганда 200 миллиард доллар кўпроқ сарфлаганини билдирди.
