Трамп АҚШ Ғазони "эгаллаб олиши" ҳақида гапирди
Унинг мулоҳазалари Ғазо секторидаги бутун аҳолини бошқа жойга – Иордания, Миср ва бошқа мамлакатларга кўчириш таклифи ортидан янгради.
АҚШ президенти Доналд Трамп Исроил бош вазири Бинямин Нетаняху билан қўшма матбуот анжуманида АҚШ "Ғазо секторини эгаллаб олишга" ва у ерда иқтисодий ривожланиш учун имкониятлар яратишга тайёрлигини айтди.
BBC дипломатик мухбири Пол Адамснинг хабар беришича, Доналд Трамп таклифлари билан барчани ҳайратда қолдиришда давом этмоқда.
Трампга кўра, АҚШ "Ғазони босиб олади", биноларни вайрон қилади, портламаган ўқ-дориларни тозалайди, "чексиз иш ўринлари" яратади ва "ўша ҳудуд аҳолиси учун" уй-жой қуради - у айнан кимни назарда тутаётганини аниқламаган.
Унинг мулоҳазалари Ғазо секторидаги бутун Фаластин аҳолисини бошқа жойга – Иордания, Миср ва бошқа мамлакатларга кўчириш таклифи ортидан янгради.
Трамп, шунингдек, фаластинликларнинг Ғазога қайтишни исташининг ягона сабаби, уларнинг бошқа иложи йўқлиги, деб даъво қилмоқда.
У Ғазо секторини "бузилиши керак бўлган ҳудуд" деб атади.
