Қўқонда сохта ДХХ ходими 6 йилга қамалди
У танишига фоизсиз кредит эвазига Cobalt машинасини олиб беришни ваъда қилган ва пул сўраган.
Фарғона вилояти Қўқон шаҳрида ўзини ДХХ ходими сифатида таништириб, фирибгарликлар содир этган шахс қамалди. У аввал ҳам судланган ва хавфли рецидивист деб топилган.
Бу ҳақда "Замон" дастурида хабар берилди.
Маълум бўлишича, фуқаро Расулов таниши Розиқовга ўз мансаб ваколатидан фойдаланиб фоизсиз кредит эвазига Cobalt машинасини олиб беришни ваъда қилган. Сўнгра ундан бош тўлов баҳонасида 1300 доллар пул олган.
Фуқаро ўз жиноий ҳаракатларини давом эттириб, бошқа танишига эски ҳайдовчилик гувоҳномасини янгисига алмаштириб бериш эвазига 800 минг сўм пул талаб қилган. Бунда гувоҳномага C ва D тоифаларини ҳам қўшиб беришни ваъда қилган.
Олиб борилган тезкор тадбирда Расулов далиллар билан қўлга олинди.
Жиноят ишлари бўйича Қўқон шаҳар судининг ҳукми билан унга олти йил қамоқ жазоси тайинланди.
Жазони қаттиқ тартибдаги колонияларда ўташи белгиланди.
