Носоз BYD можароси ижобий ҳал этилди
Хоразмдаги сервис маркази автомобилга ёрдам кўрсатишни пайсалга солган. Қашқадарёда эса Cobalt учун тўланган пул қайтарилмагани аниқланди.
Рақобат қўмитаси Ўзбекистон бўйлаб автомобил мижозларига ёрдам кўрсатди.
Қўмитага автомобиллар етказиб бериш, сотиш билан боғлиқ ҳолатлар юзасидан фуқаролардан келиб тушган мурожаатлар ўз вақтида ўрганилиб, истеъмолчиларнинг қонуний манфаатлари ҳимоя қилинмоқда.
Жумладан, Қорақалпоғистон Республикасида Амударё туманида истиқомат қилувчи фуқаро А.Д. сотиб олган “BYD Song Plus Champion” русумли автомобили бузилганлиги сабабли, Хоразм вилоятидаги "BYD Ургенч" сервис марказига олиб борганида, олди қисмидаги иккита амортизатор ишламаётганлиги аниқланган. Сервис ходимлари амортизатор 2 ойдан сўнг келишини айтганлигига норозилигини билдириб, амортизаторларни алмаштириб берилишида амалий ёрдам сўраб мурожаат йўллаган.
Мазкур мурожаатда келтирилган ҳолат юзасидан Қўмита томонидан “BYD Ургенч” сервис маркази томонидан фуқаронинг “BYD SONG PLUS CHAMPION” русумли автомобилининг олди қисмидаги жами қиймати 2 млн 298,1 минг сўм бўлган иккита амортизатор бепул алмаштирилиб берилиши таъминланди.
Қашқадарё вилояти Касби туманида яшовчи фуқаро А.М. Қарши шаҳрида фаолият олиб бораётган "FAVORITE-CARS-SERVICE" MCHJ нинг фаолиятидан норози бўлиб мурожаат ёзган.
Фуқаро яхши ниятлар билан автосалон орқали Chevrolet COBALT автомашинасига 74 001 000 сўм бошланғич тўловни амалга ошириб, шартнома имзолаган. Аммо оилавий шароитида муаммолар юзага келганлиги ва моддий ёрдам зарурлиги сабабли шартномани ўз хоҳиши билан бекор қилган ва тўланган тўловни тўлиқ қайтариш бўйича автосалон раҳбариятига мурожаат қилган.
Масала эса ижобий ҳал этилмаган яъни тўланган маблағ истеъмолчига қайтарилмаган.
Ҳудудий бошқарма томонидан олиб борилган ўрганиш ишлари натижасида “Истеъмолчиларнинг ҳуқуқларини ҳимоя қилиш тўғрисида”ги қонунига асосан истеъмолчига автомашина учун тўланган 74 001 000 сўм маблағ истеъмолчига тўлиқ қайтарилди.
Юқоридагиларга кўра, Рақобат қўмитасининг ҳудудий бошқармалари томонидан “Истеъмолчиларнинг ҳуқуқларини ҳимоя қилиш тўғрисида”ги Қонун талаблари бузилиш аломатлари билан хизмат кўрсатувчи ташкилотларга нисбатан қонунбузилиш ҳолатини бартараф этиш юзасидан бажарилиши мажбурий бўлган кўрсатмалар берилди.
