Самарқандда "Марказий Осиё – Европа Иттифоқи" биринчи саммити бўлади
Шавкат Мирзиёев Европа кенгаши раҳбари билан телефон орқали ушбу масалани муҳокама қилди.
Жорий йил апрел ойида Самарқанд шаҳрида "Марказий Осиё – Европа Иттифоқи" биринчи саммити бўлиб ўтади.
Ўзбекистон президенти Шавкат Мирзиёев бугун Европа кенгаши президенти Антониу Кошта билан бўлиб ўтган телефон орқали мулоқотида икки томонлама ва минтақавий аҳамиятга молик долзарб масалалар кўриб чиқилди.
Ўзбекистон етакчиси ва Еврокенгаш раҳбари халқаро кун тартиби ва минтақавий ҳамкорлик масалалари юзасидан ҳам фикр алмашдилар.
Шунингдек, Ўзбекистон президенти Антониу Кошта Европа кенгаши раҳбари лавозимига сайлангани билан табриклади.
Кейинги йилларда Ўзбекистон билан Европа Иттифоқи ўртасидаги кўп қиррали ҳамкорлик натижасида 2024 йилда товар айирбошлаш ҳажми 6 миллиард евродан ошди, Европа компаниялари билан лойиҳалар портфели 30 миллиард еврога етди.
Ўтган йили ўта муҳим минерал ресурслар соҳасида стратегик шериклик тўғрисида битим имзоланди. Транспорт ва рақамли ўзаро боғлиқлик, "яшил" иқтисодиёт, маданият ва бошқа йўналишларда самарали ҳамкорлик олиб борилмоқда.
