Доналд Трампга нисбатан суд ҳукми ўқилди
Жараёнда Трампнинг бўйнидан айбловлар олиб ташланмади, у энди судланган шахс сифатида лавозимга киришади.
АҚШнинг сайланган президенти Доналд Трампга "сукут учун пул" иши бўйича ҳукм ўқилди.
Суд ҳукмига кўра Трамп шартларсиз озод қилинади.
Трамп 2024 йилнинг май ойида ҳакамлар ҳайъати томонидан 2016 йилги президентлик сайлов компанияси мобайнида актриса Сторми Дэниелсга сукут сақлаши учун пул тўлагани билан боғлиқ 34 та тижорат фирибгарлиги бўйича айбдор деб топилган эди. Бугун мазкур иш юзасидан Трампга ҳукм ўқилди.
Суд Трампни шартларсиз озод қилиш ҳақида ҳукм чиқарди. Бу Трамп қамоққа олинмаслиги, жаримага тортилмаслиги ёки унга синов муддати берилмаслигини англатади.
Бироқ Трампнинг бўйнидан айбловлар олиб ташланмади, у энди судланган шахс сифатида ўз ишига киришади.
Ҳукм ўқиш жараёнида Трамп ўзининг айбсизлиги ҳақида қатъий таъкидлади ва суд ҳукмига қарши апелляция беришини маълум қилди. У 20 январдан АҚШ президенти сифатида ишга киришади.
