Исроил ҳужуми оқибатида бирданига беш журналист ҳалок бўлди

Ғазо секторида Исроил ҳарбийларининг ҳужуми оқибатида камида беш нафар фаластинлик журналист ҳалок бўлди. Бу ҳақда "Ал-Жазира" телеканали хабар берди.

Телерадиокомпаниянинг веб-сайтида эълон қилинган хабарда, Исроил армияси Quds News Network телеканали учун сунъий йўлдош орқали кўрсатувлар олиб борган машинага ҳужум қилгани кўрсатилган.

Журналистлар Нусейрат қочқинлар лагеридаги Ал-Авда шифохонаси дарвозаси олдида турган.

Телеканал ўзининг камида беш нафар ходими – Фади Ҳассоуна, Иброҳим ал-Шайх Али, Муҳаммад ал-Лада, Файсал Абу ал-Кумсан ва Айман ал-Жадий ҳалок бўлганини тасдиқлади.

Аввалроқ Журналистларни ҳимоя қилиш қўмитаси (CPJ) бош директори Жоди Гинсберг 2024 йилда дунёда камида 95 нафар журналист ва ОАВ ходимлари ҳалок бўлганини маълум қилганди.