АҚШ Давлат департаменти Беларус борасида огоҳлантириш билан чиқди
АҚШнинг Минскдаги элчихонаси ўз фаолиятини 2022 йил 28 февралда тўхтатган. Америкаликлар ушбу мамлакатда ушланса ҳуқуқий ёрдам кўрсатиш қийинлашади.
АҚШ Давлат департаменти ўз фуқароларига Беларусга саёҳат қилишдан воз кечишни тавсия қилди, ҳозирда республикада бўлганлар эса дарҳол уни тарк этиши зарур. Бу ҳақда департамент сайтида хабар берилган.
Америкаликлар "Беларус ҳукумати маҳаллий қонунларни ўзбошимчалик билан қўллаши", ҳибсга олиш хавфи, "Беларуснинг Украина билан можарода Россияга ёрдами", шунингдек, кўча тартибсизликлари ва чегараланганлиги сабабли Беларусга саёҳат қилишдан бош тортишга чақирилади. Кўнгилсизлик содир бўлган тақдирда АҚШ фуқароларига элчихонадан ёрдам кўрсатиш имкониятлари йўқ.
“АҚШ фуқаролари фавқулодда вазият юзага келганда мумкин бўлган саёҳат режаларини мунтазам равишда кўриб чиқишлари керак. Қўшни давлатлар билан чегара ўтиш жойлари баъзан олдиндан огоҳлантирмасдан ёпилади. Беларуснинг Литва, Полша, Латвия ва Украина билан чегараларидаги назорат-ўтказиш пунктлари ёпилиши мумкин”, — дейилади Давлат департаменти хабарида.
Департамент, шунингдек, агар ватандошлар Беларусда ҳибсга олинса, ёрдам кафолати йўқлиги ҳақида огоҳлантирган.
АҚШнинг Минскдаги элчихонаси ўз фаолиятини 2022 йил 28 февралда тўхтатди. Кейин Давлат департаменти буйруғи билан элчихона ходимлари эвакуация қилинди ва хизматлар кўрсатиш, шу жумладан фавқулодда хизматлар тўхтатилди.
