АҚШ Трамп ҳокимиятга келган кундаёқ ЖССТдан чиқиб кетиши мумкин
Қўшма Штатлар халқаро ташкилотнинг энг йирик доноридир, Вашингтон 2022-2023 йилларда ЖССТ харажатларининг 16 фоизини молиялаштирди.
АҚШнинг сайланган президенти Доналд Трампнинг жамоаси унинг инаугурацияси санаси, 20 январ куни мамлакат Жаҳон соғлиқни сақлаш ташкилоти (ЖССТ) таркибидан чиқишини эълон қилмоқчи. Бу ҳақда Financial Times хабар бермоқда.
Республикачилар вакиллари соғлиқни сақлаш соҳаси мутахассисларига ана шундай ният ҳақида гапириб беришди. Улар бу қадам глобал саноат учун "ҳалокатли" оқибатларга олиб келишидан огоҳлантирди, деб ёзади газета. Қўшма Штатлар халқаро ташкилотнинг энг йирик доноридир, Вашингтон 2022-2023 йилларда ЖССТ харажатларининг 16 фоизини молиялаштирди.
Вашингтондаги Жоржтаун университети профессори Лоуренс Гостиннинг таъкидлашича, АҚШнинг ЖССТдан чиқиши глобал соғлиқни сақлашни молиялаштиришда "катта бўшлиқни" вужудга келтиради, уни бошқа давлат тўлдириши қийин.
"Ташкилот қийинчиликларга дуч келади ва илмий ходимларини сезиларли даражада қисқартиришга мажбур бўлади", дея огоҳлантирди у.
2020 йилда, биринчи муддати давомида Трамп ЖССТдан чиқиш жараёнини бошлаган эди. Кейин республикачи ташкилотни молиялаштиришни тўхтатиб, уни COVID-19 тарқалиши сабабли нотўғри ишларда айблаб, ташкилот Хитой назорати остида эканлигини айтди. 2021 йилда Трампнинг ўрнига президентлик лавозимини эгаллаган Жо Байден лавозимга киришганидан кейин бир неча соат ичида ЖССТдан чиқиш буйруғини бекор қилди.
