Ёшлар тадбиркорлиги йўналишида очиқ мулоқот бўлиб ўтди
“Тошкент ёшларни севади” ойлиги доирасида ўтказилган очиқ мулоқотда таниқли тадбиркорлар — Жаҳонгир Ортиқхўжаев, Бектош Ҳотамов, Бекзод Самигжонов, Ҳасан Мамасаидовлар иштирок этиб, ёшларга ўзларининг маслаҳат ва тавсияларини беришди.
29 ноябр куни Тошкент шаҳридаги “Заковат арена”да “Тошкент ёшларни севади” ойлиги доирасида ёшлар тадбиркорлиги йўналишида очиқ мулоқот ўтказилди.
Унда тележурналист Ҳамза Жумаев, “J-United Group” компаниялар гуруҳи асосчиси Жаҳонгир Ортиқхўжаев, “Profi” таълим кластери асосчиси Бектош Ҳотамов, “Safia” қандолат маҳсулотлари тармоғи асосчиларидан бири Бекзод Самигжонов, “Dekos” компанияси раҳбари Ҳасан Мамасаидов иштирок этишди.
Очиқ мулоқотдан кўзланган асосий мақсад ёшларнинг иқтисодий билимларини ошириш ва уларни ўз бизнесларини бошлашга туртки бериш, шунингдек, ёшлар учун тадбиркорликни бошлаш бўйича зарур билим ва кўникмаларни шакллантириш мақсадида муваффақиятли тадбиркорлар ва бизнес соҳасининг мутахассислари билан тажриба алмашиш имкониятини яратиш, ёш тадбиркорларнинг инновацион ғояларини ривожлантиришга кўмаклашиш, тадбиркорликка оид муҳим масалаларни муҳокама қилиш ва амалий ечимлар таклиф қилишдан иборат.
Бу каби очиқ мулоқотлар нафақат ёшларнинг тадбиркорлик соҳасига интилишларини оширишга хизмат қилади, балки уларни замонавий бизнес технологиялари ва имкониятларидан самарали фойдаланишга қизиқтиради.
Мулоқотда таниқли ва тажрибали бизнес эгалари ўзларининг маслаҳат ва тавсияларини ёшлар билан бўлишди. Бундан ташқари, йигит-қизлар томонидан берилган саволларга жавоб беришди.
