Аёллар орасида онкологик касалликларни назорат қилиш давлат дастури маъқулланди
Дастур миллий ва халқаро экспертлар жамоаси томонидан бир йилга яқин вақт давомидаги муҳокамалардан сўнг қабул қилинди.
Шавкат Мирзиёев аёллар орасида онкологик касалликларни назорат қилишга доир давлат дастурини маъқуллади. Бу ҳақда президент ёрдамчиси Саида Мирзиёева маълум қилди.
Қайд этилишича, ҳужжатга халқаро клиник амалиётлар асос қилиб олинган. Дастур миллий ва халқаро экспертлар жамоаси томонидан бир йилга яқин вақт давомидаги муҳокамалардан сўнг қабул қилинган.
"Ҳар бир аёл электрон рўйхатга киритилади ва ҳар қандай хавфли ўзгаришлар аниқланганда тизимда “йўқолиб қолмайди”. Дастур аниқ ҳаракатлар ва даволаш протоколларини ўз ичига олган. Албатта, бу жуда катта қадам ва ушбу ўзгаришлар жараёни шахсан ўз назоратим остида бўлади", деб ёзди Саида Мирзиёева.
30 ёшдан бошлаб аёллар ҳар 10 йилда инсон папилломаси вирусига тест топшириши, 45 ёшдан 65 ёшгача эса ҳар 2 йилда маммографиядан ўтиши керак бўлади.
Эслатиб ўтамиз, 22 ноябрда “Аёллар орасида онкологик касалликларни назорат қилиш тизимини такомиллаштириш чора-тадбирлари тўғрисида”ги президент қарори имзоланганди.
