6 йил олдин ҳам шу гап айтилган
Избоскандаги абгор йўллар ҳақидаги мақоламизга туман ҳокимлиги умумий берилган муносабат билан қутулди.
Андижон вилояти Избоскан туманидаги асосий ва ички йўлларнинг абгор ҳолати ҳақида тайёрлаган репортажимизга туман ҳокимлиги матбуот хизмати умумий ва "навбатчи" муносабат билан қутулди, дейиш мумкин.
Унда айтилишича, 4Р-116 “Наманган-Пойтуғ-Андижон” давлат аҳамиятига эга автомобил йўлининг 18 км қисми туман ҳудудидан ўтган. 4К-88 “Пойтуғ-Жонобод-Мойгир” маҳаллий аҳамиятга эга автомобил йўлидаги узунлиги 7 км йўллар ҳозирги кунда қопламанинг яроқли муддати ўтгани сабабли, ички имкониятлардан келиб чиққан ҳолда мунтазам жорий таъмирлаш ва сақлаш ишлари олиб борилмоқда.
Яъни биз мақолада кўтарган муаммо бор, буни тан олишяпти. Ҳокимликнинг алоҳида таъкидлашича, мазкур йўлларни мукаммал таъмирлаш бўйича келгуси йиллар дастурларига таклифлар киритилган. Аммо айнан қайси йил экани очиқ ёзилмаган.
2018 йилда туман марказидаги эски бозор бузилиши ва янги бозор қурилиши бўйича ҳозирги ҳоким (ўша пайтда биринчи ўринбосар) Элёр Каримов одамларни сарсон қилаётган муаммони 10 кун ичида ҳал қилишга ваъда берганди.
Афсуски, орадан 6 йил ўтган бўлса-да, ораси бир-биридан узоқ бўлмаган, аммо инфратузилма ва қатнов томонидан бир қатор муаммоли бозор муаммоси ҳамон сақланиб турибди.
Матбуот хизмати ҳокимият жим турмаганини, йўлларни яхшилаш бўйича ишлар қилинганини ҳам қўшиб кетган. Жумладан, туманда жами 175 км умумфойдаланувдаги автомобил йўллари ва 886 км ички хўжалик йўллари мавжуд. Бу йўллар ҳолатини яхшилаш бўйича 2024 йил давомида туманда 36 км йўллар жорий таъмирланди, 500 метр янги пиёдалар йўлаги ва 350 метр велосипед йўллари қурилди, 700 метр пиёдалар йўлаклари таъмирланди. 360 та йўл белгиси янгисига алмаштирилди. 79 км йўл ётиқ чизиқлари чизилди. 1 та транспорт воситаларини тартибга солувчи светофор ўрнатилди.
Ички хўжалик йўллари бўйича жами 5,7 км, "ташаббусли бюджет" дастури орқали фуқаролар ташаббуси билан 9 та маҳаллада 26 км ички кўчалар асфалтланди ва 8 км қисмида асфалтлаш ишлари олиб борилмоқда. Бундан ташқари, 49 км ички кўчалар шағалланди.
