Нормат Турсунов Навоий вилояти ҳокими этиб тасдиқланди
Халқ депутатлари Навоий вилояти Кенгаши раислигига эса депутат Ғофир Алиев сайланди.
Нормат Турсунов Навоий вилояти ҳокими лавозимига тасдиқланди. Бу ҳақда вилоят ҳокимлиги матбуот хизмати хабар берди.
Қонунчиликка асосан, вилоят ҳокими лавозимига номзод Президент томонидан кўрсатилиб, партия гуруҳлари билан маслаҳатлашув ўтказилади. Бугунги сессия давомидаги маслаҳатлашув натижаларига кўра, Турсунов Нормат Тулкунович бир овоздан Навоий вилояти ҳокими лавозимига тасдиқланди.
Халқ депутатлари Навоий вилояти Кенгаши раислигига 30-Тамабахрин сайлов округидан сайланган депутат Алиев Ғофир Қуватович сайланди.
Сессияда халқ депутатлари вилоят Кенгашига сайланган депутатларнинг партия гуруҳлари рўйхатдан ўтказилиб, вилоят Кенгашининг Регламенти ва доимий комиссиялар тўғрисидаги Низом тасдиқланди.
Эслатиб ўтамиз, бугун Самарқанд ва Хоразмда ҳам ҳокимлар тасдиқланди.
