Февралда беқарор об-ҳаво бўлиши кутиляпти

Жорий йилнинг февраль ойида Ўзбекистон аҳолисини қандай об-ҳаво кутмоқда? Гидрометеорология хизмати эҳтимолий об-ҳаво маълумотини тақдим этди. 

Умуман олганда, февраль ойи одатдагидан бироз илиқроқ бўлади. Ўртача ойлик ҳаво ҳарорати меъёр атрофида бўлиши кутилмоқда, баъзи жойларда меъёрдан 1-1,5^ога юқори бўлиб, 2-4^о илиқни, шимолда 2^о совуқ-1^о илиқни, жанубда 6-8^о илиқни ташкил этади.

Февраль ойининг боши нисбатан совуқ бўлади. Биринчи беш кунликда ҳаво ҳарорати асосан кечалари 0-5^о совуқ, кундуз кунлари 2-7° илиқ, баъзи жойларда 0-2°совуққача бўлади.

Ёмғир ва қор кўринишидаги ёғингарчилик 1 февраль ва 4 февраль кунлари республиканинг марказий ва шарқий вилоятларида, 3 февралда жанубий вилоятларида бўлиб ўтади.

Иккинчи беш кунликда ҳарорат кечалари 0-5^о илиққача, кундуз кунлари 8- 13^о илиққача кўтарилади. 7-8 февраль кунлари асосан ёмғир кўринишидаги ёғингарчилик бўлиши мумкин.

Кейинчалик, ойнинг охиригача, ҳарорат кечаси 2-7^о илиқдан 2-7^о совуққача, кундуз кунлари 13-18^о илиқдан 2-7^о илиққача, шимолда кечалари 0-5^о илиқдан 7-12^о совуққача, кундуз кунлари 11-16^о илиқдан 0-5^о илиққача ўзгариб туради. 

Февраль ойида ёғингарчилик миқдори меъёрдан кам, баъзи жойларда меъёр атрофида бўлиши кутилмоқда.

Иқлимий маълумотларга кўра, республика ҳудудининг катта қисмида бутун куз-қиш даври давомида февраль ойи ёғингарчилик энг кўп бўладиган ой деб ҳисобланади.

Бироқ, ёғингарчилик миқдори бўйича, ҳамда, ҳарорат тартиби бўйича февраль ойи жуда турлича бўлиши мумкин.

Эслатиб ўтамиз, ортда қолаётган январ ойи Ўзбекистонда анчагина қуруқ келди, фақат ой охирига келиб давомли ёғингарчиликлар кузатилмоқда. Шунингдек, метеорологлар мамлакат аномал совуқ кутилмаётганини маълум қилишганди.