Полша президенти судда жавоб беради
Бунга унинг миграция инқирози бўйича филмга берган изоҳи сабаб бўлган. Дуда президентлик муддати тугагач судга чақирилади.
Полша президенти Анжей Дуда фуқароларни ҳақорат қилиш иши бўйича президентлик муддати тугагандан сўнг судга чақирилади. Бу ҳақда Полшанинг Ксенофобия ва ирқчилик хулқ-атворини мониторинг қилиш маркази хабар берди.
Илгари марказ президент устидан миграция инқирози мавзусини кўтарган "Яшил чегара" фильми ҳақидаги баёнотлари юзасидан шикоят қилган эди. Дуда фильм томошабинларини "чўчқалар" деб аташда айбланмоқда.
Марказ Facebook ижтимоий тармоғида даъво бўйича эшитувлар ўтказилишини эълон қилди. Варшава округ судида марказнинг президентга қарши даъвоси бўйича суд мажлиси 2025 йил 24 октябр куни маҳаллий вақт билан соат 10:00 га белгиланган. Иш очиқ кўриб чиқилади ва ҳамма суд залидан кузатиши мумкин.
Режиссёр Агниешка Ҳолланд томонидан суратга олинган "Яшил чегара" фильмининг премьераси 2023 йил сентябрида Венеция кинофестивалида бўлиб ўтди. Фильм воқеалари Беларус-Полша чегарасида 2020 йилларнинг бошида содир бўлади. Бош қаҳрамонлар қочқинлар, афғонистонлик инглиз тили ўқитувчиси ва суриялик оила. Улар Европа Иттифоқи мамлакатларига киришга ҳаракат қилиб, улар чегарада қолиб кетишади.
Полшанинг TVP телеканалида Анжей Дуда фильмни танқид қилиб, у "Полша чегарачиларни ҳақорат қилмоқда", деди. Президент, шунингдек, “фильмни томоша қилган чегарачиларнинг "Кинода фақат чўчқалар ўтиради" деган иборани қўллаганидан ажабланмаганини” айтди. Бу баёнотдан кўп ўтмай, марказ президент устидан судга мурожаат қилганини маълум қилди.
