Путин армиядаги хизматчилар сонини қарийб 2,4 миллион кишига оширди

Россия президенти Владимир Путин икки йил ичида учинчи марта армия хизматчилари сонини оширди.

Путин ўз фармони билан Россия Қуролли Кучларининг штат даражасини 2 миллион 389 минг 130 кишига оширди, бу рақам 1,5 миллион ҳарбий хизматчини ўз ичига олади ("шу жумладан, 1 миллион 500 минг ҳарбий хизматчи", — дейилади ҳужжатда). Фармон 2024 йил 1 декабрдан кучга киради.

Бунгача Путин ўтган 2023 йилнинг декабр ойида Россия армиясининг штат сонини 2 209 130 кишига, шу жумладан 1 320 000 ҳарбий хизматчига оширган эди. Шундай қилиб, яна 180 минг ҳарбий хизматчи қўшилади.

2022 йил август ойида, Украинада уруш бошланганидан олти ой ўтгач, Россия Қуролли Кучларининг штат сони 1 150 628 нафар ҳарбий хизматчига кўтарилди. Ўша пайтда Россияда 2017 йилги фармон амалда эди - унга кўра, штатда 1 013 628 нафар ҳарбий хизматчи бўлиши керак эди, бу кўрсаткич уруш бошланишида ҳам долзарб бўлган.