Ўзбекистон аҳолисининг аксарият қисми маймунчечакка қарши иммунитетга эга экани маълум қилинди

Ўзбекистон аҳолисининг аксарият қисмида маймун чечакка қарши жамоавий иммунитет мавжуд. Бу ҳақда Санэпидқўмита маълум қилди.

Маймун чечаги – вирусли инфекция бўлиб, организмнинг умумий заҳарланиши ҳамда терида ўзига хос тошмалар тошиши билан кечади.

“Маймун чечаги” касаллиги Ўзбекистон ҳудудига кириб келиши эҳтимоли жуда кам. Негаки “маймун чечаги” касаллиги қайд қилинаётган Европа мамлакатларида беморлар ва мулоқотда бўлганларга нисбатан алоҳидалаш чоралари олиб борилмоқда, эпидемияга қарши амалга оширилаётган чора-тадбирлар эса самара бераётгани айтилмоқда.

Санэпидқўмита хабарига кўра, Ўзбекистонда истиқомат қилаётган 1980 йилдан аввал туғилган катта ёшдагилар чечак (ҳалқ тилида чин чечак) касаллигига қарши тўлиқ эмланган.

Aйнан шу қатламда жамоавий иммунитет мавжуд, боиси чин чечакка қарши эмлашдан кейин ҳосил бўлган иммунитет маймун чечагига қарши ҳам ишлайди ва касалликнинг кенг тарқалиш хавфини пасайтиради, дейилади қўмита хабарида.

ЖССТ Европа иттифоқи маълумотларига кўра маймун чечаги эпидемияси COVID-19 пандемияси даражасида глобал муаммо туғдирмайди. ЖССТ Европа минтақавий бюроси директори Ханс Клюге дунёнинг қатор мамлакатларида mpox (маймун чечаги) вируси тарқалиши билан боғлиқ эпидемик вазият юзасидан баёнот берар экан, ваҳимага берилишга ҳожат йўқ деб таъкидлаган.

Касаллик тарқалишини олдини олиш мақсадида:

-маймун чечаги касаллиги бўйича эпидемиологик нохуш давлатларга сафарларни чеклаш;

- иш юзасидан хизмат сафарига борилган тақдирда, ёввойи ҳайвонлар ва кемирувчилар (маймунлар, каламушлар) билан мулоқотда бўлмаслик;

-жамоат жойларига чиқишда шахсий гигиенага қаътий риоя қилиш;

-тана харорати кўтарилган ёки тошмалар тошган йўловчилар билан бирга харакатланишга тўғри келганда имкон қадар санитария-мухофаза (ижтимоий) масофани сақлаш, тиббий ниқоблардан фойдаланиш, қўлларни зарарсизлантирувчи воситалар билан ишлов бериш;

-жамоат транспортларида тиббий ниқоблардан фойдаланиш, транспортдан тушгандан сўнг қўлларни зарарсизлантирувчи воситалар билан тозалаш тавсия этилади.

Эслатиб ўтамиз, маймунчечак ҳозирда Африка, Европа ва Осиёнинг айрим давлатларида қайд этилган.