Жанубий Кореяда машина босиб кетиши оқибатида тўққиз киши ҳалок бўлди
Уч киши шифохонага оғир аҳволда ётқизилган. Айрим нашрлар 13 нафар қурбон ҳақида ёзмоқда.
Жанубий Кореяда 68 ёшли ҳайдовчи Сеул мэрияси яқинида пиёдаларни уриб юборди, натижада тўққиз киши ҳалок бўлди, камида олти киши жароҳатланди, деб хабар бермоқда Yonhap ахборот агентлиги.
Ҳодиса Сеул марказида содир бўлган. Тўққиз нафар қурбон орасида олти нафари воқеа жойида вафот этган, уч нафари шифохонага ётқизилган ва кейинроқ вафот этгани маълум қилинган.
Уч нафар кишининг аҳволи оғирлигича қолмоқда. Ўлганларнинг барчаси 30 ёшдан 60 ёшгача бўлган эркаклардир.
Жанубий Кореянинг айрим ахборот сайтлари 13 кишининг ўлими ҳақида хабар бермоқда.
Гувоҳларнинг айтишича, ЙТҲ содир этган машина тўсатдан орқага бурила бошлаган, иккита машинага бориб урилган, пиёдалар йўлагига чиқиб кетган ва светофорнинг яшил ёнишини кутаётган пиёдаларга бориб урилган.
Ҳайдовчи воқеа жойида ушланиб, шифохонага етказилган. Унинг сўзларига кўра, машина тўсатдан ўз-ўзидан тезлашган ва у спиртли ичимлик истеъмол қилмаган.
