Эронда биронта номзод 50 фоиздан ошиқ овоз тўплай олмади

Эрон давлат телевидениеси жума куни бўлиб ўтган президентлик сайловларининг дастлабки натижаларини эълон қилди.

 14 миллиондан ортиқ овоз ҳисобланганидан сўнг, табризлик ислоҳотчи Масуд Пезешкиан 5,9 миллион овоз билан етакчилик қилмоқда, 5,5 миллион овоз билан консерватив Саид Жалилий иккинчи ўринда, 1,89 миллион овоз билан Мустафо Поурмуҳаммадий учинчи ўринда.

Номзодларнинг ҳеч бири биринчи турда ғалаба қозониш учун зарур бўлган 50% овозни ҳали тўплагани йўқ, бу эса иккинчи турни ўтказишни талаб қилади.

Сайловлар Ғазо секторидаги можаро билан боғлиқ Яқин Шарқдаги кескин вазият фонида ўтмоқда. Апрел ойида Исроил Эроннинг Дамашқдаги консуллигига ҳаво ҳужуми уюштирди ва шундан сўнг Эрон биринчи марта тўғридан-тўғри Исроил ҳудудига ракета ва учувчисиз самолётларни учирганди. 

Халқаро кузатувчиларга анъанавий тарзда овоз бериш жараёнини кузатишга рухсат берилмаган.

Хабар қилинишича, Сиестон ва Балужистон вилоятларида сайлов бюллетенларини олиб кетаётган фургонга ҳужум уюштирилган, натижада икки полициячи ҳалок бўлган.

Сайловчилар иштироки ҳақидаги маълумотлар ҳали эълон қилинмаган. 

Бу кўрсаткич Эроннинг мавжуд сиёсий тизимини халқ томонидан қўллаб-қувватланишининг муҳим кўрсаткичи ҳисобланади.