Миграция, Россия ва айбловлар: Байден ва Трамп ўртасида дебат ўтказилди
Атланта шаҳрида бўлиб ўтган баҳсда собиқ ва амалдаги президентлар бир-бирларини "чиройли" сўзлар билан "сийлашди".
АҚШнинг Жоржия штатининг Атланта шаҳрида АҚШнинг амалдаги президенти Жо Байден ва собиқ президент Доналд Трамп ўртасида сайловолди теледебат бўлиб ўтди.
CNN телеканали томонидан ташкил этилган ва жонли эфирга узатилган баҳснинг биринчи босқичи бир ярим соат давом этди. Студияда томошабинлар йўқ эди, CNN бошловчилари мунозарани бошқариб, саволлар беришди. Байден ва Трамп навбатма-навбат гаплашишди ва иштирокчилардан бири гапираётганда иккинчисининг микрофони ўчирилди.
Баҳснинг биринчи қисми иқтисодий муаммолар, миграция, аборт ва Американинг ички кун тартибидаги бошқа масалаларга бағишланди, аммо суҳбат тезда халқаро мавзуларга айланди.
Биринчидан, улар Афғонистондан Америка қўшинларининг тартибсиз олиб чиқилиши ҳақида гапиришди - Трамп буни "бу мамлакат тарихидаги энг шармандали лаҳза" деб атади ва кейинроқ бу вазият Россияни ҳам Украинага бостириб киришга ундаганини айтди.
"Мен ҳаётимда ҳеч қачон бунчалик бемаъни гапларни эшитмаганман", деди Байден.
Трамп яна бир бор ғалаба қозонган тақдирда ҳам, расман лавозимга киришишидан олдин ҳам можарони ҳал қилишини айтди, шунингдек, Россия президенти Владимир Путин томонидан Украинада илгари сурилган тинчлик шартларини мақбул деб ҳисобламаслигини айтди.
Дебат иштирокчилари мунтазам равишда бир-бирларини ёлғонда айблаб, бир-бирларига ҳужум қилишарди. Бир пайтлар Жо Байден Трампнинг ҳарбий хизматчилар ва фахрийларга муносабатини муҳокама қилар экан, собиқ президентни мағлуб деб атади. Трампнинг айтишича, Байден тарихдаги энг ёмон президентдир.
